Bakı. Trend:
Son illərdə C5 formatının, indi isə C6 formatının fəal şəkildə inkişafı göstərir ki, region ölkələri güclənən geosiyasi rəqabət şəraitində hər hansı bir tərəfi seçmək niyyətində deyil, əksinə, onlar öz mövqelərini möhkəmləndirməyə can atırlar.
Trend xəbər verir ki, bunu bu gün Qazaxıstanın Asiya Araşdırmalar İnstitutunun direktoru Sultan Akimbekov Bakıda keçirilən “C6: Vahid region, ortaq gələcək – strateji dialoqun gücləndirilməsi” mövzusunda beynəlxalq konfransda deyib.
“Geosiyasi ziddiyyətlərin getdikcə daha proqnozlaşdırılmaz xarakter aldığı şəraitdə ümumi maraqlara malik olmaq, onları müdafiə etməyi bacarmaq və ən əsası, mövcud geosiyasi sarsıntılar fonunda yaranan imkanlardan istifadə etmək vacibdir. Bu, o cümlədən Orta Dəhliz çərçivəsində həm ölkəmizin, həm də Mərkəzi Asiya və Qafqazın digər dövlətlərinin təhlükəsizliyinə aid olan əsas məsələdir”, – deyə o bildirib.
Sultan Akimbekov vurğulayıb ki, C6 formatı nəqliyyat marşrutlarının formalaşdırılması və inkişafı ilə bağlı proseslərin inkişafının mümkün variantlarından biri kimi görünür.
“Söhbət yalnız mövcud infrastruktur imkanlarından istifadə etməkdən deyil, həm də yeni və səmərəli həllərin axtarışından gedir”, – deyə o, yekunlaşdırıb.