Azərbaycan, Bakı / Trend , müxbir S.Babayeva/ Azərbaycanda bu il dənli bitkilərin istehsalı proqnozlaşdırılan 2 mln. tona çatacaq, çərşənbə günü Kənd Təsərrüfatı Nazirliyindən verilən məlumatda belə deyilir.
Dövlət Statistika Komitəsindən verilən məlumata görə, oktyabrın 1-də ölkədə dənli bitkilərin yığımı (qarğıdalı istisna olmaqla) 2006-cı ilin oktyabrın 1-nin 1,9 mln. ton göstəricisi ilə müqayisədə 1,8 mln. ton təşkil edib. Ötən illə müqayisədə bir hektar üçün orta məhsuldarlıq 26,2 sentnerə çatıb.
Qarğıdalı yığımı 146,7 min ton təşkil edib ki, bu da ötən ilin analoji dövrünün göstəricisindən 2,9 min ton çoxdur, hektardan məhsuldarlıq 46,1 sentner təşkil edib. Kənd Təsərrüfatı Nazirliyindən bildiriblər ki, 10 min ton qarğıdalının yığılması planlaşdırılır.
2006-cı ildə Azərbaycanda dənli bitkilərin istehsalı 2,7 mln. ton, tələbat isə 3 mln. ton təşkil edib. Tələbatın qalan hissəsi idxal hesabına ödənir.