Azərbaycan, Bakı/ Trend , müxbir S.Babayeva/ Azərbaycan ilin sonunadək Azərbaycan bazarına mal və xidmətlərin daxil olması üçün gömrük tariflərinin maksimal dərəcələri üzrə təkmilləşdirilmiş təklifləri hazırlamağı və ÜTT-ə təqdim etməyi planlaşdırır. Bu barədə cümə günü ÜTT məsələləri üzrə Azərbaycan Xarici İşlər Nazirliyinin birinci katibi Şövqü Mehdizadə məlumat verib. "Gömrük tariflərindən başqa, bütün digər sənədlər də ÜTT-nin katibliyinə təqdim edilib"-o bildirib. Mehdizadə dərəcələr üzrə konkret rəqəmləri bildirməkdə çətinlik çəksə də, qeyd edib ki, piroritet sahələr-kənd təsərrüfatı sahəsində milli maraqların qorunması dərəcəsi indikindən yüksək olacaq. Katibin rəyinə görə, bu sənədləri planlaşdırılan dövr ərzində ÜTT-ə təqdim etmək mümkün olacaq. Təşkilatla danışıqların 5-ci mərhələsinin 2008-ci ilin birinci rübündə keçiriləcəyi ehtimalı böyükdür. Azərbaycan indiyədək ÜTT ilə dörd görüş keçirib. İlk iki görüş xarici ticarət rejiminə dair məsələlərin müzakirəsinə həsr edilib. Ölkə 2005-ci ildən etibarən, sonuncu iki görüşdə tammiqyaslı danışıqlara başlayıb. İkitərəfli danışıqlar Azərbaycan bazarına mal və xidmətlərin daxil olması məsələləri ətrafında aparılır. Çoxtərəfli danışıqlar isə, kənd təsərrüfatının daxildən dəstəklənməsi və bu sahədə ixrac subsidiyları məsələləri üzrəkeçirilir. 1997-ci ildən Azərbaycan ÜTT-də müşahidəçi qismində təmsil olunur.
...