Azərbaycan, Bakı, 21 aprel / Trend , müxbir İ.Xəlilova / Beynəlxalq Maliyyə Korporasiyası (BMK) Azərbaycan və Mərkəzi Asiyada lizinqin inkişafına texniki yardım layhəsini genişləndirməyə və Azərbaycan Milli Bankı (AMB) nəzdində fəaliyyət göstərən Mərkəziləşdirilmiş Kredit Reyestrinin (MKR) dəyşdirilməsinə dəstək göstərməyə hazırdır. Bu barədə bazar ertəsi Azərbaycan Respublikasında layihə rəhbəri Teymur Eybatov bildirib.
Onun sözlərinə görə, texniki yardım məsləhətçilərin cəlb edilməsi və treninqlərin keçirilməsinə istiqamətləndirilə bilər. Regionda kredit reyestrinə yardım istiqamətləri mayın 21-24-də Praqada keçiriləcək regional konfrans zamanı müəyyən olunacaq.
AMB və digər təşkilatların nümayəndələri Çexiyada bu sahədə qanunvericiliyə müvafiq fəaliyyət göstərən Kredit Bürosunun işi ilə tanış olmaq üçün imkan əldə edəcəklər.
MKR 2005-ci ilin mart ayında Dünya Bankının "Azərbaycanın maliyyə sektruna texniki yardım" layihəsi çərçivəsində yaradılıb. Kredit reyestri bankların kredit risklərinin idarə olunması üzrə alətlərdən biridir. Hazırda Milli Bank əhatə sahələrinin genişləndirilməsi vasitəsilə reyestrin təkmilləşdirilməsi üzərində işləyir. Bu günədək MKR-dan yalnız banklar istifadə edir. Baxmayaraq ki, "qeyri-bank kredit təşkilatına dair" qanun layihəsi kredit reyestrində QBKT-ya üzvlüyə imkan verir, lakin istifadəçilərin dairəsi kredit reyestrinin tam olaraq avtomatlaşdırılmasından sonra genişlənə bilər. Yalnız bundan sonra sənəd dövriyyəsini sürətləndirmək və reyestr işinin operativliyinin təmin edilməsi mümkün ola biləcək.
AMB informasiya mübadiləsi prosesinin kredit reyestrindən "on-line" rejiminə keçilməsi ilə əlaqədar banklarla danışıqlara başlayıb. Bu, avtomatlaşdırılmış rejimdə saytdan kredit tarixinin yoxlanılması üçün lazımi informasiyanı əldə etməyə imkan verəcək. Hazırkı vəziyyətdə Milli Bank onları banklara kağız şəklində təqdim edir.
MKR işinin təkmilləşdirilməsi, xüsusilə də etibarlılığın artırılması, informasiya mübadiləsi prosesinin sürətləndirilməsi ilə əlaqədar "Mərkəziləşdirilmiş kredit reyestrinə dair" Nizamnaməyə dəyişiklik etməyi planlaşdırır.
Strategiyaya görə, Milli Bank gələcəkdə MKT-nı kommersiya banklarının idarəçiliynə verməyi nəzərdə tutub. MKT-nın kommersiya banklarının idarəçiliynə keçməsi kredit reyestrinin inkişafı üzrə tədbirlərin həyata keçirilməsindən sonra baş verəcək. AMB-da hesab edirlər ki, MKT AMB-sız səmərəli və gələcəkdə istitutlaşmış inkişafa 1,5-2 il ərzində hazır ola bilər. Bu, Milli Bankın strateji məqsədidir və kredit reyestr sisteminin yaxşılaşdırılması və təkmilləşdirilməsindən, həmçinin bankların hazırlığından asılıdır. Hələ ki, sistem tam gücü ilə işləmir və bu da bankların onun xidmətindən nə dərəcədə müntəzəm istifadə edəcəyindən asılıdır.
Müəlliflə əlaqə saxlamaq üçün elektron ünvan : [email protected]
