Azərbaycan, Bakı, 01 may / Trend , müxbir S.Babayeva/ "Azərsu" ASC 2009-cu ildə Bakı şəhərində su sayğaclarının quraşdırılması prosesini başa çatdıracaq, deyə bu həftə dövlət başçısı İlham Əliyevin sədrliyilə ölkədə su təchizatı, meliorasiya, irriqasiya və kanalizasiya sistemlərinin inkişaf layihələrinə həsr olunmuş iclasda sözügedən təşkilatın rəhbəri Nizaməddin Rzayev məlumat verib. Bu barədə rəsmi mətbuatın cümə axşamı yayılmış məlumatında bildirilib.
"Bu il əlavə olaraq 150 min sayğac quraşdırılacaq" - deyə o bildirib.
Rzayevin sözlərinə görə, hazırda Bakı şəhərində "Azərsu"nun 500 mindən çox abunəçisi var, onlardan 200 mini su sayğacına malikdir.
Çoxmərtəbəli binalarda abunəçilərə su sayğacı ölkənin dövlət büdcəsindən ayrılmış vəsaitlər hesabına pulsuz quraşdırılır. Özəl bağ evlərində isə sayğaclar qanunvericiliyə əsasən, abunəçilərin öz vəsaitləri hesabına quraşdırılmalıdır.