Azərbaycan, Bakı, 02 may/ Trend , müxbir İ.Xəlilova/ Azərbaycan parlamenti bu gün keçirilən plenar iclasda Azərbaycanın 2008-ci il dövlət büdcəsinə edilən düzəlişləri təsdiq edib.
Maliyyə naziri Samir Şərifov bildirib ki, büdcə proqnozlarına düzəlişlər nəticəsində, ümumi büdcə gəlirləri 2008-ci il üçün əvvəllər təsdiqlənən gəlirlərə nisbətən 66,4 faiz, 2007-ci ildəki faktiki daxilolmalara nisbətən isə 2,2 dəfə artaraq, 17 464,7 mln. manat təşkil edib. Bununla yanaşı, dövlət büdcəsinin gəlirləri 10 484 mln. manat (2007-ci ilə nisbətən 74,5 faiz, 2008-ci ildəki əvvəlki proqnozlara nisbətən isə 41,8 faiz artım), NMR büdcəsi - 218,8 mln. manat (2007-ci ilə nisbətən 4,3 faiz azalma, 2008-ci ilə nisbətən 1,4 faiz artım), Dövlət Neft Fondunun gəlirləri - 10 144,7 mln. manat (müvafiq olaraq, 5,4 dəfə və 2,8 dəfə artım), Dövlət Sosial Müdafiə Fondunun gəlirləri isə, 1 405,5 mln. manat (30,2 faiz və 10,8 faiz) səviyyəsində müəyyən edilib.
Ümumi dövlət bücəsinin xərcləri 12 774,1 mln. manat səviyyəsində təsdiq edilib. Xərclər 2007-ci ildəki faktiki xərclərə nisbətdə 72,9 faiz, 2008-ci ildəki əvvəlki proqnozlara nisbətən isə 25,3 faiz artıb. Dövlət büdcəsinin xərcləri 2007-ci ilə nisbətən 81,7 faiz, 2008-ci ilin proqnozlarına nisbətən 29,8 faiz - 11 060,6 mln. manatadək, NMR - 218,8 mln. (müvafiq olaraq 3,4 faiz azalma, 1,4 faiz artım), ARDNF - 4 371,1 mln. manat (artım 4,1 və 2,6 dəfə), DSMF - 1 405,5 mln. manat artıb (39,8 faiz və 10,8 faiz). Xarici kreditlər hesabına maliyyələşdirilən layihələrə çəkilən xərclər 2007-ci illə müqayisədə 3,5 dəfə artaraq, əvvələr təsdiq edilmiş səviyyədə - 506,4 mln. manat səviyyəsində qalıb.
Nazirin sözlərinə görə, dövlət başçısı qeyri-neft sektorunun inkişafını, ərzaq təhlükəsizliyi çərçvəsində ehtiyatların yaradılmasını, həmçinin, investisiya layihələrinin reallaşdırılmasını əsas prioritetlər kimi müəyyən edib. Dövlət büdcəsindən ərzaq təhlükəsizliyinin təmin edilməsi üzrə tədbirlərin keçirilməsinə əlavə olaraq 156,6 mln. manat ayırmaq planlaşdırılır. Bu vəsaitləri kənd təsərrüfatına dövlət dəstəyinin artırılmasına, meliorasiya və irriqasiya işlərinin sürətləndirilməsinə, taxılın saxlanılması üçün xüsusi anbarların tikintisinə yönəltmək planlaşdırılır.
Nazir həmçinin bildirib ki, ölkə hökuməti taxıl bitkilərinin məhsuldarlıq həcminin artırılması üçü əlavə addımlar atmağı nəzərdən keçiri. Bununla bağlı toxumçuluğun inkişafına böyük diqqət ayrılacaq.
Dövlət büdcəsindən kapital yatırımlarına əlavə olaraq 1,505 mlrd. manat ayrılacaq və onların ümumi həcmi 4,326 mlrd. manatadək çatdırılacaq. Bu vəsaitlərdən 1,112 mlrd. manat avtomobil yolları, nəqliyyat, enerji təchizatı, rayonların qazlaşdırılması sahələrində infrastruktur layihələrinin reallaşdırılmasına yönəltmək planlaşdırılır.
Şərifovun sözlərinə görə, dövlət büdcəsinin əlavə xərcləri dörd istiqamət hesabına formalaşdırılacaq. Maliyyə Nazirliyi üçün vergi toplanması proqnozu 7,6 faiz (380 mln. manat) artaraq 5,380 mlrd. manata, Dövlət Gömrük Komitəsi - 0,9 faiz artaraq (10 mln. manat) 1,110 mlrd. manata, Dövlət Neft Fondundan transfertlər - 2,7 mlrd. manat artırılaraq 3,8 mlrd. manata, büdcə təşkilatlarının pullu xidmətlərindən gələn daxilolmalar üzrə 1,5 mln. manat artırılaraq 137,5 mln. manata çatdırılacaq.
Parlamentin bugünkü iclasında, həmçinin, 2007-ci il dövlət büdcəsinin yerinə yetirilməsi üzrə hesabat təsdiq edilib.
Mayın 2-ə olan rəsmi məzənnə - 0,829 AZN/USD.
Müəlliflə əlaqə saxlamaq üçün elektron ünvan: [email protected]
