Azərbaycan, Bakı, 13 iyun/ Trend Cap , müxbir İ.Xəlilova/ Azərbaycanın qeyri-neft sektorunun inkişaf templəri digər neft hasilatı ölkələrində bu sektorun inkişaf templərini ötür. Bu barədə ölkənin iqtisadi inkişaf naziri Heydər Babayev Bakıda keçirilən Caspian International Investment Company (CIIC) I investisiya konfransında məlumat verib.
2007-ci ilin yekunları üzrə ölkənin qeyri-neft sektorunun real artımı 11,3 faiz təşkil edib. Bu il isə artımın 11,6 faiz səviyyəsində olacağı gözlənilir. Nazirin rəyinə görə, bu, ölkədə ümumi iqtisadi artımla bağlıdır. Son dörd il ərzində ÜDM-in artımı 96 faiz təşkil edib, dövlət büdcəsi 10 dəfə artıb, yoxsulluğun səviyyəsi isə 19 faizədək azalıb. Azərbaycanda müvafiq biznes mühiti yaradılıb ki, bu da Dünya Bankı və BMK-nın oktyabrda açıqlanacaq yeni "Doing Business" hesabatında öz əksini tapacaq.
Nazir bildirib ki, konfransın əsas məqsədi Azərbaycanın qeyri-neft sektorunda layihələrin gələcək maliyyələşdirilməsi üçün Fars körfəzi ölkələrindən CIIC-ə investisiyaların cəlb edilməsidir. Azərbaycan İnvestisiya Şirkəti xarici sərmayədarların cəlb edilməsində körpü və tərəfdaş rolunu oynayacaq. Babayevin rəyinə görə, onun CIIC-də iştirakı multiplikasiya effektinə nail olmağa imkan verəcək.
"Dünya iqtisadiyyatındakı vəziyyət islam dünyası ölkələrinin əməkdaşlığının canlanmasına səbəb olur, - Babayev hesab edir. Dini dünyagörüşdən əlavə, ərəb ölkələri BMT-də Qarbağ məsələsi müzakirə olunarkən Azərbaycanın lehinə səs verdikləri zaman biz onlardan siyasi dəstək də aldıq".
Özəl Sektorun İnkişafı İslam Korporasiyasının (İCD İslam İnkişaf Bankı qrupuna daxildir) icraçı direktoru Xalid Əl-Əbudinin rəyinə görə, konfransın əsas məqsədi Korporasiyaya üzv ölkələrin Azərbaycanın özəl sektoruna sərmayələrin yatırılmasına cəlb edilməsidir.
"Biz CIIC-i dəstəkləməyə, həmçinin, Xəzər İnvestisiya Şirkəti vasitəsilə layihələrin maliyyələşdirilməsi yolu ilə maliyyə yardımı göstərməyə hazırıq", - Əbudi qeyd edib.
Onun sözlərinə görə, ilkin mərhələdə CIIC-in kapitalı $10 mln. səviyyəsində formalaşdırılacaq, gələcəkdə isə, $70 mln.-dək genişləndiriləcək.
AİŞ-in icraçı direktoru Anar Axundov hesab edir ki, İslam Korporasiyası ilə əməkdaşlıq il ərzində nüfuzlu müəssisələrlə səmərəli iş aparmağa imkan verib.
"Korporasiya ilə iş bizim üçün böyük təcrübə olub və birbaşa investor olaraq, AİŞ layihələrin CIIC kimi investisiya strukturları vasitəsilə maliyyələşdirilməsinə üstünlük verir, - Axundov hesab edir. Tərəfdaşların etibarını qazanmaq üçün biz bir sıra addımlar atır, auditor yoxlamasından keçirik".
Konfransda Fars körfəzi ölkələrindən 30 sərmayədar iştirak edir. Onlar qanunvericilikdəki yeniliklər, iqtisadi islahatlar, ölkədəki investisiya iqlimi ilə tanış ediləcəklər.
Caspian International Investment Company (CIIC) ilkin mərhələdə 2,95mln. kapitalla Azərbaycan İnvestisiya Şirkəti və İCD tərəfindən Qapalı Səhmdar Cəmiyyəti kimi təsis edilib. AİŞ-in iştirak payı 25 faiz təşkil edəcək və onun ödənilməsi üçün $14 mln. verəcək. Şirkət təkcə AİŞ və İCD-nin (ilkin mərhələdə onun iştirak payı 75 faiz təşkil edəcək) deyil, həm də Yaxın Şərq və Fars körfəzindən olan sərmayədarların vəsaitləri hesabına formalaşdırılacaq.
Belə maliyyə institutunun yaradılması təşəbbüsü 2006-cı il noyabrın 8-9-da ərəb institutları və sərmayədarlarının iştirakı ilə Bakıda keçirilən investisiya konfransı çərçivəsində, İİB prezidenti Əhməd Məhəmməd Əliyə məxsusdur.
İyunun 13-nə olan rəsmi məzənnə 0,8189 AZN/USD.
Müəlliflə əlaqə saxlamaq üçün elektron ünvan: [email protected]