Azərbaycan, Bakı, 20 avqust/ Trend , müxbir E.İsmayılov/ Gürcüstanın Poti limanının rəhbərliyi saxlama obyektlərinin defisiti ilə əlaqədar, yaxın vaxtlarda quru yüklə gələn yeni gəmilərin boşaldılmasının dayanmasından ehtiyat edir. Limanın işindəki vəziyyət şənbə günü Gürcüstanın Kaspi şəhəri yaxınlığında körpünün partladılması ilə bağlıdır. Belə ki, körpünün partladılması dəmir yolu qatarlarının dövriyyəsini aparmağa imkan vermir. Bu barədə çərşənbə günü limanın Marketinq və İnvestisiyalar Departamentinin rəhbəri Zviad Çxartişvili Trend -a məlumat verib.
"Tezliklə gəmilərin boşaldılması da mümkün olmaycaq, bütün terminallar yüklə doludur. Anbar potensialı, demək olar ki, tükənib", - Çxartişvili telefonla bildirib. Limanın anbar gücü 200 min tondur.
Onun sözlərinə görə, Gürcüstan daxilində dəmir yolu əlaqəsi normallaşdırılmazsa, liman öz işini tamamilə dayandıracaq. "Mən dəmir yoluna [Gürcüstan] zəng etdim. Mənə dedilər ki, [partladılmış] körpü həftə ərzində bərpa ediləcək", - Çxartişvili bildirib.
Rusiya hərbi texnikası çərşənbə axşamı limana yeridildiyindən, onun işi tamamilə iflic olub. Rusiya hərbçiləri Gürcüstan üçün humanitar yardımla Amerika gəmisinin gələcəyi limanda vəziyyətə nəzarət edirdilər.
"Rusiya hərbçiləri limandan gecə çıxıblar", - Çxartişvili bildirib.
Gücü ildə təxminən 3,5 mln. ton olan Poti limanı Azərbaycan və Türkmənistandan şəffaf neft məhsullarının aşırılması üzrə ixtisaslaşıb. Terminalın sahibi Gürcüstan-Türkiyə birgə müəssisə Channel Energy şirkətidir. Onun səhmlərinin 75 faizi Türkiyənin Delta Petroleum şirkətinə, qalan pay liman administrasiyasına məxsusdur. Terminal ümumi boşaltma sırası 48 sistern olan ikitərəfli dəmir yolu estakadasına malikdir. Liman 25-30 min ton dedveytli gəmilərə xidmət göstərir.
Müəlliflə əlaqə saxlamaq üçün elektron ünvan: [email protected]
