Azərbaycan, Bakı, 15 sentyabr / Trend , müxbir İ.Xəlilova/ "AccessBank" (keçmiş Azərbaycan Mikromaliyyələşdirmə Bankı) ipoteka proqramının realizəsinə başlamağa zərurətin olduğunu görmür və əsas səyləri mövcud bank məhsullarının inkişafına yönəltmək niyyətindədir, bankın Baş meneceri Endrü Pospiyelovski bazar ertəsi keçirilən və bankın adının dəyişdirilməsinə həsr olunmuş mətbuat konfransında bildirib.
"Bu gün biz həm kiçik və orta sahibkarlığa, həm də Azərbaycan əhalisinə tam bank xidmətləri spektri göstərən lider banka çevrilmişik, - Pospiyelovski bildirib. - Biz adımızı dəyişsək də, səhmdarlarımız və missiyamız əvvəlki kimidir - həm kiçik və orta sahibkarlığın, həm də aşağı gəlirli ailələrin tam bank xidmətləri spektrinə çıxışını təmin etmək".
O hesab edir ki, ölkədə bu məhsullara tələbat böyükdür və bununla əlaqədar "AccessBank" regional şəbəkənin genişləndirilməsi vasitəsilə bütün ölkədə bu xidmətlər üzrə əməliyyatların həcmini artıracaq. Strategiyaya əsasən, 2010-cu ilə ölkə regionlarındakı filialların sayını 15-ə çatdırmaq planlaşdırılır. Hazırda 18 mövcud filialdan 11-i Abşeron yarımadasında yerləşir.
Sentyabra olan məlumatlara əsasən, bank ümumi məbləği $182 mln. manat olan 68 min kredit verib. Fəaliyyət göstərdiyi beş il ərzində "AccessBank"ın portfeli $438 mln. təşkil edib, hər kreditin orta həcmi isə $2,9 min olub. Ümumilikdə 146 min kredit verilib.
Bu gün bank kreditləşmə ilə yanaşı, cari hesab və depozitlər, pul köçürmələri, Visa kartlarına xidmət göstərilməsi və sair bu kimi xidmətlər təqdim edir. Əmanətlərin cəlb edilməsinə qoyulan ikiillik məhdudiyyətə baxmayaraq, bu gün bankın depozit portfeli $30 mln.-a çatıb.
2007-ci ilin avqustundan "AccessBank" aqrokreditlərin verilməsinə başlayıb və il ərzində ümumi məbləği $16 mln. olan 8 min layihə maliyyələşdirilib.
Bankın kapitalı 20 mln. manat səviyyəsində formalaşdırılıb. Bank səhmdarlarının strukturu aşağıdakı kimidir: Avropa Yenidənqurma və İnkişaf Bankı - 20 faiz, Beynəlxalq Maliyyə Korporasiyası - 20 faiz, Qara dəniz Ticarət və İnkişaf Bankı - 20 faiz, KfW Development Bank - 20 faiz, AccessHolding - 16,53 faiz, və Almaniyanın LFS Financial Systems GmbH şirkəti - 3,47 faiz paya malikdir.
Kapitallaşma nəticəsində bankın məcmu kapitalı 38 mln. manatadək çatdırılıb.
Sentyabrın 15-nə olan cari mübadilə məzənnəsi -- 0,8118 AZN/USD.
Müəlliflə əlaqə saxlamaq üçün elektron ünvan: [email protected]
