Azərbaycan, Bakı, 16 oktyabr/ Trend / Azərbaycanda ilk dəfə Avrasiya Sement Forumu - VIII "Sement sənayesi və bazar" BusinessCem Baku - 2008 Beynəlxalq Mərkəzi Asiya konfrans və sərgisi keçiriləcək. Forumun təşkilatçıları Rusiyanın "BiznesÇem" və Azərbaycanın Garadagh Cement şirkətləridir.
Garadag Cement-in məlumatında bildirilir ki, forum oktyabrın 19 - 21 - də Bakıda keçiriləcək.
Asiyada birinci ən iri beynəlxalq sement forumu BusinessCem 2001 - ci ilin oktyabrında Daşkənddə (Özbəkistan) keçirilib və dünyanın 20 ölkəsindən 200 - dən çox mütəxəssis forumda iştirak edib. Mərkəzi Asiya və Avropa regionlarına maraq daim artır.
BusinessCem Baku - 2008 - in gedişində Azərbaycan, Rusiya, MDB ölkələrinin sement sənayesində vəziyyət müzakirə ediləcək və aşağıdakı məsələlərə baxılacaq: tikinti materilları, sement və onun əsasında hazırlanan məmulatlar bazarlarının vəziyyəti və inkişaf tendensiyaları; müasir iqtisadi vəziyyətdə sərmayə yatırımları istiqamətləri; sement müəssisələrinin müasirləşdirilməsi, yenidən qurulması və tikintisi; sement və tikinti materiallarının istehsalı üçün (beton, gips, quru qarışıqlar və s.) qabaqcıl texnologiya və avadanlıqların tətbiqi; hasilat texnologiyası və avadanlığı, karyerlərin işlənilməsi və xammalın nəqli; sement idxalı; məhsulun sertifikatlaşdırılması və keyfiyyətinə yeni tələblər; sement və tikinti materillarının tədarükünün logistikası; enerji təchizatı; müəssisələrin alternativ yanacaq növlərinə keçirilməsi; tullantısız, ekoloji baxımdan təhlükəsiz istehsal.