Azərbaycan, Bakı, 29 oktyabr/ Trend müxbir İ.Xəlilova/ Azərbaycan parlamenti Azərbaycan və Almaniya Federativ hökumətləri arasında 2006-2007-ci illərdə texniki əməkdaşlıq haqqında sazişi təsdiqləyib. Saziş ölkəyə 5 mln. avro həcmində qrantın ayrılmasını nəzərdə tutur.
Saziş 2008-ci il avqustun 4-də Bakıda imzalanıb.
Özəl sektorun dəstəklənməsi layihəsinə 3,4 mln. avro məbləğində texniki yardım ayrılacaq. Layihənin həyata keçirilməsinə görə Azərbaycanın İqtisadi İnkişaf Nazirliyi məsuliyyət daşıyır. İkinci layihə hüquqi və məhkəmə islahatlarının dəstəklənməsini nəzərdə tutur və AFR hökuməti bu layihəyə 1,6 mln. avro ayıracaq.
Almaniya tərəfdən layihələrin həyata keçirilməsi Alman Texniki Yardım Cəmiyyətinə, GTZ-yə həvalə edilib.
Sazişə əsasən, müvafiq layihələr çərçivəsində alınan avadanlıq və nəqliyyat vasitələri vergilər, o cümlədən ƏDV və digər dövlət ödənişlərindən (rüsum və inzibati xərclər) azad edilirlər. Bundan əlavə, malların lisenziyalaşdırmadan azad edilməsi, həmçinin onların təxirəsalınmaz gömrük rəsmiləşdirilməsi nəzərdə tutulur.
Müəlliflə əlaqə saxlamaq üçün elektron ünvan: [email protected]