Azərbaycan, Bakı, 28 noyabr / Trend , N.İsmayılova/ Cümə günü Dünya Bankı ilə Azərbaycan hökuməti arasında "Azərbaycanda sosial müdafiənin inkişafı" layihəsi üzrə 54,6 mln. dollar məbləğində kredit razılaşması imzalanıb.
Razılaşmanı Azərbaycan hökumətindən əmək və əhalinin sosial müdafiəsi naziri Füzuli Ələkbərov, DB - dən Bankın nümayəndəsi Qreqori Yeceyçak imzalayıb.
DB layihənin maliyyələşməsi üçün Beynəlxalq İnkişaf Assosiasiyasının şərtlərilə (35 il - 10 il güzəştli müddətə və illik 0,75 faizlə) 26,7 mln. dollar ayıracaq.
Bu layihə mayın 27- də DB Direktorlar Şurasında imzalanıb.
Layihə dörd hissədən ibarətdir: əmək bazarının tam müasirləşdirilməsi, o cümlədən, əmək qanunvericiliyinin, əməyin mühafizəsi sisteminin, məşğulluq xidməti işinin təkmilləşdirilməsi, sosial təminat sistemi siyasətinin formalaşması; təqaüd sisteminin müasirləşməsi və layihənin idarəsi.
Bu çərçivədə tam institusional inkişaf və peşəkar təlim sisteminin müasirləşməsi, Avropa təcrübəsi əsasında peşəkar təsnifçilərin hazırlanması nəzərdə tutulur. Nazirlik yanında peşəkar təlim mərkəzlərinin yaradılması planlaşdırılır.
Layihənin beş il müddətinə - 2008 - 2013-cü illər ərzində realizəsi nəzərdə tutulub.
Sosial sektorda DB artıq bir layihəni maliyyələşdirib. 2005 - ci ildən realizə olunan "Təqaüd islahatları və sosial təminat" layihəsinə Bank 10 mln. dollar ayırıb.
Müəlliflə əlaqə ünvanı: [email protected]
