Azərbaycan, Bakı, 13 dekabr/ Trend , müxbir N.İsmayılova/ Azərbaycanın "Texnika Bank"ı 2009-cu ildə məcmu kapitalını 90 mln. manatadək artırmağı planlaşdırır, - bankın İdarə Heyəti sədrinin birinci müavini Xaqani Quluzadə şənbə günü bildirib.
"İndi bankın məcmu kapitalı təxminən 60 mln. manat təşkil edir. 2009-cu ildə isə onu 50 faiz artırmağa hazırlaşırıq", - Quluzadə bildirib.
Onun sözlərinə görə, məcmu kapitalın bankın mənfəəti və Nizamnamə kapitalının yüksəlməsi hesabına artacağı gözlənilir. Bu gün 27 mln. manat təşkil edən Nizamnamə kapitalı 20 faiz artırılacaq və 30 mln. manta çatdırılacaq.
Bundan başqa, bank gələn il digər maliyyə göstəricilərini də artırmağı planlaşdırır. Bankın aktivləri və kredit portfeli 10-15 faiz artırılacaq, - Quluzadə deyib. İndi kredit portfelinin yarısını biznes-kreditlər təşkil edir. Bank gələn il onların həcmini 60-70 faiz artırmaq niyyətindədir.
"Lakin 2009-cu ildə "Texnika Bank" istehlak kreditlərinin verilməsini artırmaq niyyətində deyil. Belə ki, indi öz kredit siyasətində biznes kreditlərinə daha çox üstünlük verir", - bankın İdarə Heyəti sədrinin müavini deyib.
İndi "Texnika Bank" filial şəbəkəsinin kefiyyət göstəricilərinə görə, Azərbaycan bankları arasında birinci yeri tutur. Bununla əlaqədar olaraq, bank 2009-cu ildə regional filialların inkişafı və genişləndirilməsini davam etdirmək niyyətindədir, - Quluzadə deyib.
Dekabrın 13-nə olan cari mübadilə məzənnəsi - 0,806 AZN/USD.
Müəlliflə əlaqə saxlamaq üçün elektron ünvan: [email protected]
