Azərbaycan, Bakı, 18 dekabr/ Trend , müxbir Ü.İsmayılova/ Yaxın yarımildə Azərbaycanda daşınmaz əmlakın qiyməti xeyli düşəcək. Əmlakı indi alanlar da uduzmayacaqlar, - "MBA Group" Konsaltinq Şirkətinin eksperti Faiq İbrahimov cümə axşamı bildirib.
"Hazırda ölkənin daşınmaz əmlak bazarında tam durğunluq müşahidə olunur və belə vəziyyət üç aydır davam edir", - İbrahimov deyib.
Onun rəyinə görə, bazardakı bu vəziyyət daşınmaz əmlaka tələbatın yoxluğu ilə əlaqədar yaranıb. Əhali və sərmayədarlar gözləmə mövqeyini tutublar.
Son aylar paytaxtın elit yeni tikilmiş binalarında qiymətlərin 5,2 faiz azalması müşahidə olunur, qiymətlərə görə bazar portfelində belə mənzillərin payı 7,1 faiz azalıb. Bununla yanaşı, MBA Group-un eksperti bu mənzillərin təklifinin 3 faiz artdığını qeyd edir.
"Azərbaycanın daşınmaz əmlak bazarında vəziyyət maliyyə böhranı ilə əlaqədar qiymətlərin düşdüyü dünya daşınmaz əmlak bazarında vəziyyətlə birbaşa əlaqəlidir", - İbrahimov bildirib.
MBA Group -un ekspertlərinin hesablamalarına görə, noyabrda Bakının daşınmaz əmlak bazarında qiymətlər 1,7 faiz - bir kv. metrə görə 1687 dollaradək azalıb.
MBA Group - ölkə iqtisadiyyatının, demək olar ki, bütün sahələrində müntəzəm monitorinqlər aparan konsaltinq şirkətidir.
Müəlliflə əlaqə saxlamaq üçün elektron ünvan: [email protected]
