Azərbaycan, Bakı, 19 dekabr/ Trend , müxbir N.İsmayılova/ Azərbaycanın Parex Leasing & Factoring lizinq şirkətinin gələcək fəaliyyəti ilə bağlı vəziyyət onun təsisçisi - Latviyanın Parex Bank-ının beynəlxalq təşkilatlardan kredit xəttləri almasından sonra aydınlaşacaq. Bu barədə bankın Bakı nümayəndəliyinin rəhbəri Andreys Krivans bildirib.
Parex Leasing & Factoring MMC dünya maliyyə böhranına görə yeni layihələrin maliyyələşdirilməsini dayandırıb. Hazırda lizinq şirkəti fəaliyyətini davam etdirir və köhnə layihələrlə işləyir.
"Biz Avropa İttifaqı və Dünya Bankından dövlət xəzinəsinə daxil olacaq, o cümlədən bizim banka da ayrılacaq kredit resurslarını gözləyirik. Bu bütün fəaliyyətin canlanmasına gətirəcək", - deyə Krivans bildirib.
Onun sözlərinə görə, Parex Leasing & Factoring-in gələcək fəaliyyəti ilə bağlı məsələ cari ilin sonunadək həll olunacaq.
"Düşünürəm ki, indi hər şey ümumi vəziyyətdən asılıdır, bankımızın fəaliyyəti yoluna düşən kimi Parex Leasing & Factoring işini davam etdirəcək", - deyə bank nümayəndəliyinin rəhbəri bildirib.
Latviya hökuməti bankı müflisləşmədən xilas etmək üçün noybrdakı növbədənkənar iclasında Parex Bank-ın kapitalında nəzarət səhm paketinin əldə edilməsi barədə qərar qəbul edib. Hökumətin 51 faizlik iştirak payı paketi dövlətə məxsus Latvijas Hipoteku un zemes banka-a verilib. Lakin dekabrın 3 -də Latviya hökumətinin təcili iclasında Parex Bank-ın səhmlərinin 84,83 faizinin dövlətin nəzarətinə götürülməsi barədə qərar qəbul olunub. Dövlət bankın sindikatlaşdırılmış kreditlərinə zəmanət vermək öhdəliyi götürüb.
Parex bank Latviyanın iri bankıdır. 2008 - ci il aprelin sonuna olan məlumatlara görə, o, respublikada cəlb edilən əmanətlərin (19,8 faizlik bazar payı ilə) həcminə görə birinci, aktivlərin (14,4 faizlik bazar payı ilə) böyüklüyünə görə ikinci yeri tutub.
Parex Leasing and Factoring 2005 - ci ilin martından fəaliyyət göstərir. Parex Bank-ın lizinq şirkətləri Moskva, Sankt-Peterburq, Kiyev, Minsk, Tallin və Vilnüsdə də fəaliyyət göstərir. Parex Leasing & Factoring-ın Nizamnamə kapitalı 50 min dollardır. Şirkətin lizinq portfeli avqustun əvvəlinə 46,9 mln. dollar təşkil edib.
Məqalə müəllifi ilə əlaqə ünvanı - [email protected]
