Azərbaycan, Bakı, 09 yanvar / Trend , müxbir E.İsmayılov/ Azərbaycan Nəqliyyat Nazirliyi Bakıda ikinci dairəvi yolun çəkilməsi çərçivəsində Xocahəsən-Lökbatan avtomobil yolu sahəsinin çəkilməsi üzrə işlərə başlayıb, - Nəqliyyat Nazirliyində, işlərə yaxın mənbə cümə günü bildirib.
Mənbənin sözlərinə görə, "indi bu sahənin tikintisi üzrə işlər gedir, lakin onun nə zaman başa çatacağı hələ məlum deyil".
Xocahəsən-Lökbatan yol sahəsinin uzunluğu 11 km təşkil edəcək. Bu sahə birinci dairəvi yola birləşdiriləcək. Onun tikintisini Azərbaycanın "Texnikaservis" şirkəti aparır.
İkinci dairəvi yolun tikintisi layihəsi onun sahil boyunca Lökbatan, Xocahəsən, Biləcəri, Novxanı, Məhəmmədi, Pirşağı, Maştağa, Hövsandan keçəcəyini nəzərdə tutur. İkitərəfli və dörd xəttdən ibarət olacaq yeni yolun uzunluğu 58-60 km təşkil edəcək. Dairəvi yolda onlarla körpü və yolayırıcının tikintisi də planlaşdırılır.
İkinci dairəvi yol Bakı buxtasında (Bayıl və Zığ qəsəbələri yaxınlığında) salınması planlaşdırılan körpü ilə birləşdirilə bilər, - Bakının nəqliyyat infrastrukturunun inkişafı üzrə layihələrin idarə edilməsi qrupunun rəhbəri Ömər Qoçulu əvvəllər bildirib.
Koreyanın "Dong Sang Engineering" şirkəti yanvarın sonunda Bakı buxtasında yeni körpünün salınmasının bir neçə variantını Azərbaycan Nəqliyyat Nazirliyinə təqdim edəcək. Bütün variantlar nəzərdən keçiriləcək və onlardan biri təsdiqləndiyi halda, işçi layihənin hazırlanması başlayacaq. Koreya şirkəti körpünün salınması və istismara verilməsini şəxsi vəsaitləri hesabına həyata keçirəcək, layihə öz xərcini ödədikdən sonra isə, Azərbaycan tərəfinə veriləcək (Build-Operate-Transfer sistemi üzrə). Bu layihənin realizəsinə Azərbaycanın sərmayələri nəzərdə tutulmur. Körpü ilə gediş pullu olacaq.
İlkin hesablamalara görə, Bakı buxtası rayonunda körpünün salınması üzrə layihənin dəyəri 1,2-1,3 mlrd. dollar təşkil edir. Dəniz hissəsinin uzunluğu 14 km təşkil edəcək. Beş il ərzində bu obyektin tikintisi üzrə işləri tamamlamaq planlaşdırılır.
Müəlliflə əlaqə saxlamaq üçün elektron ünvan: [email protected]
