Azərbaycan, Bakı, 19 yanvar/ Trend , müxbir N.İsmayılova/
Azərbaycanın Dövlət Əmlakının İdarə Edilməsi üzrə Dövlət Komitəsi Səyyar Dəniz Balıq Ovu SC-nin (dəniz balıqçılğı üzrə müəssisə) səhmlərinin satışına investisiya müsabiqəsi elan edib, - Dövlət Komitəsindən bazar ertəsi bildiriblər.
Satışa müəssisənin səhmlərinin 99,79 faizlik paketi çıxarılıb. Müsabiqədə Azərbaycanın fiziki və hüquqi şəxsləri və xarici sərmayədarları iştirak edə bilərlər.
İddiaçılar balıqçılığın təşkili, eləcə də balığın emalı və satışı üzrə təkliflərlə birlikdə investisiya proqramını təqdim etməlidirlər.
Müsabiqədə iştirak etmək istəyənlər investisiya təklifinin dəyərinin 5 faizi ölçüsündə bank zəmanətini təqdim etməlidirlər. İddiaçılar dövlət büdcəsinə və 2 min özəlləşdirmə çekinin ödənilməsi üçün Dövlət Komitəsinə 90 min manat verilməsi üzrə təkliflərini verməlidirlər.
Səyyar Dəniz Balıq Ovu balıqçılığın təşkili, o cümlədən tutulmuş balığın emalı və satışı ilə məşğul olur. Müəssisə Xətai rayonu, Zığ şossesi 37 ünvanında yerləşib və 212 kv.m ərazini tutur.
SC- nin Nizamnamə kapitalı 92,7 min manat təşkil edir və bu məbləğdə, hər birinin dəyəri 2 manat olan 46 359 səhm buraxılıb. Müsabiqənin predmeti, ümumi nominal dəyəri 92,5 min manat olan 46 263 səhmdir.
Yanvarın 1 - nə olan vəziyyətə görə, müəssisənin 13,3 min manat borcu var. Səyyar Dəniz Balıq Ovu-nun debitor borcları 6,1 min manat təşkil edir.
Müəssisə 1996 - cı ildən fəaliyyət göstərir, işçilərinin sayı 12 nəfərdir. İddiaçılar müsabiqənin tələbləri, özəlləşdirmə planı ilə fevralın 24 - dək saat 10:00 - 17:30 - dək qeyd olunan ünvanda tanış ola və əlavə məlumat ala bilərlər. Sənədlər və təkliflər 24 fevral saat 10:00 - dan 17:30- dək qəbul olunur. Təkliflər 26 fevral saat 10:30 - dan Dövlət Əmlakının İdarə Edilməsi üzrə Dövlət Komitəsinin binasında, müsabiqə komissiyası tərəfindən nəzərdən keçiriləcək.
Yanvarın 19 - na olan cari mübadilə məzənnəsi -- 0,8036 AZN/USD.
Müəlliflə əlaqə saxlamaq üçün elektron ünvan: [email protected]
