Azərbaycan, Bakı, 21 yanvar/ Trend , müxbir N.İsmayılova/
Azərbaycan Dövlət Sosial Müdafiə Fondu (DSMF) pensiyaların maliyyələşdirilməsi ilə bağlı heç bir çətinlik hiss etmir. Bu barədə Fondun sığorta pensiya siyasəti və strateji araşdırmalar departamentinin direktoru Elman Mehdiyev bildirib.
"Pensiyaların maliyyələşdirilməsi üzrə nə Sosial Fondun, nə də nəğd pulla təminat üzrə bankların problemi yoxdur", - deyə Mehdiyev bildirib.
Onun sözlərinə görə, nəğd pul çatışmazlığı hiss olunmur, lakin çoxlu sayda insanların pensiya müavinətlərini bir gündə alması zamanı inkassasiya problemi yaranır ki, bu da növbələrə səbəb olur.
Şəhərlərdə bütün pensiyalar bütünlüklə plastik kartlarla verilir, kəndlərdə bu göstərici 84 faizə yaxındır.
"Biz plastik kart almaq istəyənlərin hamısını təmin etmişik, kəndlərdə pensiyaların maneəsiz alınması üçün kifayət qədər bankomat quraşdırılıb", - deyə departament direktoru bildirib.
2009 - cu ildə Fondun xərclər strukturunda 1,66 mlrd. manat pensiya ödəmələrinin payına düşəcək. Bununla yanaşı, pensiya ödəmələri strukturunda 1,21 mlrd. manat (24,2 faizlik artım) əmək pensiyasının baza hissəsinin payına, 450 mln. manat (31 faiz) - əmək pensiyasının sığorta hissəsinin payına, o cümlədən 49 mln. manat onun 2008 - ci il ərzində qeydə alınan (20,8 faiz təşkil edib) inflyasiya səviyyəsi üzrə indeksləşdirilmənin payına düşəcək.
Xərclər formalaşdırılarkən əmək pensiyasının verilməsi üçün 2009-cu ildə pensiyaya çıxacaq pensionerlərin sayı da nəzərə alınıb: 1947-ci il təvəllüdlü kişilər və 1952-ci il təvəllüdlü qadınlar, həmçinin, 1958 - ci il təvəllüdlü üç uşaqlı analar, 1959- cu il təvəllüdlü dörd uşaq anaları və s.
Aparılan hesablamalara görə, 2009 - cu ildə Azərbaycanda pensiyaçıların orta sayı 1,29 mln. nəfər, o cümlədən ilin əvvəlinə - 1,277 mln. pensiyaçı, 2010-cu ilədək- 1,303 mln. nəfər proqnozlaşdırılır.
Yanvarın 21- nə olan rəsmi məzənnə 0,8045 AZN/USD təşkil edir.
Məqalə müəllifi ilə əlaqə ünvanı - [email protected]