Azərbaycan, Bakı, 21 yanvar/ Trend , müxbir Ü.İsmayılova/
2009 - cu il yanvarın 1-nə Azərbaycanda pensiyaçıların sayı 1,27 mln. nəfər təşkil edib, - Azərbaycanın Dövlət Statistika Komitəsindən çərşənbə günü bildiriblər.
"Bu gün ölkədə hər 1 min nəfərə 313 pensiyaçı düşür", - Komitədən bildiriblər.
Əmək pensiyasının orta səviyyəsi 96 manata çatır ki, bu da ölkədə orta əmək haqqının 36 faizini təşkil edir.
Dövlət Statistika Komitəsinin məlumatına əsasən, ilin əvvəlinə ünvanlı sosial yardım alan şəxslərin sayı 750 min nəfər təşkil edib. Bir adama düşən müavinətin məbləği 22 manat təşkil edir. Ötən il ərzində pensiya təminatı hüquqlarından məhrum 285,2 min nəfər 9,7 mln. manat sosial müavinət alıb.
Azərbaycanda ölkə əhalisinin sosial vəziyyətinin yaxşılaşdırılması üçün 2008 - ci il dekabrın 30-da prezidentin "2009 - 2015-ci illərdə sığorta - pensiya sisteminin inkişafı Dövlət Proqramı"nın təsdiq edilməsi barədə fərmanı verilib.
Azərbaycan Avropa Sosial Xartiyasına 2006 - cı ildə qoşulub. Xartiyanın bəndlərindən biri orta aylıq pensiyanın məbləğini ölkədə orta aylıq əmək haqqının 40 faizinə çatdırılması və bu həddin azaldılmamasını nəzərdə tutur.
Avropa Sosial Xartiyası azadlıq və hüquqları elan edir, iştirakçı dövlətlərin bu hüquq və azadlıqlara riayət etməsinə zəmanət vermək üçün nəzərdə tutulan nəzarət mexanizmini müəyyənləşdirir. Xartiya sosial təminat, sosial yardım və sosial xidmət hüquqlarını, yoxsulluqdan müdafiə hüququnu; ailə və yaşlı şəxsin müdafiəsi üçün xüsusi tədbirlərin görülməsini nəzərdə tutur.
Yanvarın 21-nə olan cari mübadilə məzənnəsi -- 0,8045 AZN/USD.
Müəlliflə əlaqə saxlamaq üçün elektron ünvan: [email protected]
