Azərbaycan, Bakı, 23 yanvar/ Trend , müxbir S.Babayeva/ 2008-ci ildə Azərbaycanda kənd təsərrüfatı məhsullarının dəyəri 3,3 mlrd. manat təşkil edib ki, bu da 2007-ci il göstəricisindən 535 mln. manat çoxdur, - kənd təsərrüfatı naziri İsmət Abbasov rəsmi mətbuata müsahibəsində bildirib.
Kənd təsərrüfatının ÜDM-in strukturundakı payı 5,8 faizə çatıb.
"Bu işdə kənd təsərrüfatı məhsulları istehsalçılarına hər bir dəstəyi göstərən hökumətin xidmətləri böyükdür", - Abbasov deyib.
2007-2008-ci illərdə kənd təsərrüfatı məhsulları istehalçılarına yanacağın alınması üçün ölkənin dövlət büdcəsindən 146 mln. manat subsidiya ayrılıb.
Nazirin sözlərinə görə, 2008-ci ildə rekord həcmdə dənli bitki məhsulu - 904,7 min hektar əkin sahəsindən təxminən 2,5 mln. ton yığılıb. Hər hektara düşən orta məhsuldarlıq 0,5 senter artıb və 27,6 senter təşkil edib. Bu dövr ərzində emal üçün şəkər çuğunduru istehsalı 181,5 min tona, tərəvəz istehsalı - 1,2 mln. tona, meyvə istehsalı - 711,5 min tona, üzüm istehsalı - 115,2 min tona çatıb.