Azərbaycan, Bakı, 29 yanvar/ Trend , müxbir N.İsmayılova/
Azərbaycanın Vergilər Nazirliyi vergi borclarının alınması sistemini təkmilləşdirmək məqsədilə, vergi qanunvericiliyini təkmilləşdirməyi və elektron hərracların keçirilməsinə başlamağı planlaşdırır, - Vergilər Nazirliyi Baş Vergi Siyasəti və Strateji Araşdırmalar İdarəsinin Strateji araşdırmalar şöbəsinin rəhbəri Vüsal Şıxəliyev cümə axşamı bildirib.
Hərraclar vergi borcunu ödəmək istəməyən vergi ödəyicisindən müsadirə edilmiş əmlakın satışı məqsədilə keçiriləcək.
"İnternet vasitəsilə hərracların keçirilməsi Nazirliyə hərrac iştirakçılarının sayını artırmağa imkan verəcək, eləcə də iştirakı daha da rahatlaşdıracaq", - Şıxəliyev deyib.
Onun sözlərinə görə, belə təcrübə Avropa İttifaqının əksər ölkələrində sınaqdan keçirilir və Azərbaycan onların nümunəsinə əməl edəcək.
Elektron hərracların keçirilməsi üzrə iş artıq bu il başlayacaq. İşlər vergi qanunvericiliyinə dəyişikliklərin edilməsi ilə müşayiət olunacaq.
Vergi qanunvericiliyinin strateji istiqamətlərinin təkmilləşdirilməsi konsepsiyasına əsasən, bu dəyişiklik fiskal orqanların fəaliyyətinin səmərəliliyinin artmasını sürətləndirəcək.
Müəlliflə əlaqə saxlamaq üçün elektron ünvan: [email protected]