Аzərbaycan, Bakı, 17 fevral / Trend , müxbir Ü.İsmayılova/ "Azərbaycanın sığorta şirkətləri dünya maliyyə böhranının təsirlərinin azaldılması üzrə proqramlar hazırlamaq və tətbiq etmək niyyətindədirlər", - bazar ertəsi Azərbaycan Sığortaçılar Assosiasiyasının idarə heyətinin sədri, MBASK sığorta şirkəti idarə heyətinin rəhbəri Cəmil Məlikov bildirib.
"Azərbaycan sığorta bazarı ölkənin başqa iqtisadi sahələri kimi, dünya maliyyə böhranının təsirini öz üzərində hiss edib və bu səbəbdən də bazarın gələcək inkişafı üçün bu tədbirlər vacibdir", - Məlikov qeyd edib.
Onun sözlərinə görə, dünya maliyyə böhranı şəraitində hər bir sığorta şirkətinə ayrı-ayrılıqda və ümumilikdə bazarın inkişafı üzrə tədbirlərin hazırlanması üçün əlavə imkanlar yaradılıb.
"Bazarın inkişafı üzrə vacib tədbirlərdən biri yeni sığorta məhsullarının yaradılması və tətbiq edilməsi, eləcə də müştəri bazasının böyüdülməsidir", - Məlikov əlavə edib.
Assosiasiya həmçinin ölkədə beynəlxalq konfransların keçirilməsi, reklam çarxlarının göstərilməsi və başqa işlərlə sığorta mədəniyyətinin təbliği üzrə tədbirləri artırmaq niyyətindədir.
Azərbaycanda 28 sığorta və bir təkrar sığorta şirkəti fəaliyyət göstərir. Ölkənin maliyyə nazirliyinin operativ məlumatlarına görə, şirkətlərin mükafatları 179,26 milyon manat təşkil edib. Ödəmələrin həcmi 49,81 milyon manat olub.
Məqalə müəllifi ilə əlaqə ünvanı: [email protected]