Türkmənistan, Aşqabad, 23 fevral / Trend , müxbir E.Həsənov/ "Türkmənistan prezidenti Qurbanqulu Berdımuhammedov əhaliyə rahat mənzillərin tikintisi və alınması üçün güzəştli kreditlərin verilməsi haqda hökümət qərarlarının dəqiq yerinə yetirilməsinin təmin edilməsini tələb edib", - rəsmi türkmən mənbəyi məlumat verib.
Yarım il əvvəl qəbul olunmuş Konstitusiyada ilk dəfə vətəndaşların şəxsi evlərinin tikintisi və ya alınması üçün dövlət dəstəyinə təminat haqda maddələr peyda olub. Prezidentin sərəncamlarına əsasən yaşayış şəraitinin yüksəldilməsi üçün ipoteka kreditlərinin verilməsi nəzərdə tutulub. İpotekanın müddəti 30 ildir. Kreditin faizi illik cəmi bir faizdir. Üstəlik, əsas borcun ödənilməsi üçün beş ilə qədər güzəşt mümkündür.
Ancaq səlahiyyətli banklar kredit xətlərini vaxtında açmır, mənzil tikintisini də gecikdirirlər. Türkmənistanın yüksək nəzarət palatasının sədri Orazmurad Qurbannazarov dövlət başçısına bir çox əsaslı çatışmazlıqları ortaya çıxaran yoxlamanın nəticələri haqda məruzə edib.
Bununla əlaqədar olaraq Berdımuhammedov ilk növbədə öz narazılığını paytaxt administrasiyasına ünvanlayıb. "Vəzifə öhdəliklərinin qeyri-kafi yerinə yetirilməsi, şəhər xidmətlərinin fəaliyyəti üzərində nəzarətin zəiflədilməsi, aşağı keyfiyyətli yaşayış binalarının istismara verilməsi hallarına rast gəlindiyi" üçün Aşqabadın meri Azat Bilişova ciddi töhmət elan olunub. Qeyd olunub ki, "bütün bu çatışmazlıqlar və səhvlər Aşqabad administrasiyası tərəfindən lazımi nəzarətin olmamasının nəticəsidir". Dövlət başçısı materialları prokurorluq orqanlarına verilməsi və "günahkarların müəyyənləşdirməsi" haqda sərəncam verib.
Berdımuhammedov paytaxtın kommunal təsərrüfatının ümumi işini xarakterizə edərək bildirib ki, yüksək istismar keyfiyyətli yolların, yaşayış binalarının, mühəndis-kommunikasiya şəbəkələrinin saxlanılması kimi belə gündəmdə olan məsələlərin həllinə müasir, sistemli yanaşma mövcuddur. "Dövlət bu məqsədlər üçün böyük vəsaitlər ayırır ki, onlar da lazımi şəkildə istifadə olunmur", - Türkmənistan prezidenti bildirib.
Məqalə müəllifi ilə əlaqə ünvanı: [email protected]
