Azərbaycan, Bakı, 03 mart / Trend , müxbir E.İsmayılov / Xəzər Dənizi Neft Donanmasındakı (XDND) işlərə yaxın olan mənbənin çərşənbə axşamı verdiyi məlumata əsasən, SOKAR-a məxsus XDND və bu yaxınlarda donanma tərəfindən xilas olunmuş Rusiyanın "Sarmat-1" gəmisinin sahibi olan "Naviqator" QSC-nin rəhbərliyi xilasetmə işləri üzrə kompensasiyanın ödənilməsi barədə razılıq əldə ediblər.
"Bizim rəhbərliklə gəmi sahibləri xilasetmə işlərinə görə ödənişin həyata keçirilməsi barədə razılığa gəliblər. Məbləğ ödənildikdən sonra gəmi Bakını tərk edə bilər", - məlumatı verən mənbə deyib.
Bir müddət öncə gəmiyə daxilində olduğu yüklə birlikdə həbs qoyulmuşdur. Gəmi Həştərxan (Rusiya) - Ənzəli (İran) marşrutu ilə 1655,2 ton metal məmulatları və taxta-şalban daşıyırdı.
Həbs qərarı gəmi sahiblərinin xilasetmə işlərinə görə, 1989-cu ildə qəbul olunmuş beynəlxalq konvensiyaya müvafiq olaraq, xilas edən tərəfin xərclərini ödəməkdən boyun qaçırdığına görə tətbiq edilmişdir. Məsələni həll etmək məqsədi ilə XDND Beynəlxalq dəniz arbitrajına üz tutmuşdu. Arbitraja müraciət etməkdən ötrü XDND "Hill Dickinson"-un Yunanıstan nümayəndəliyinə müraciət ünvanlamalı olmuşdu.
"Sarmat-1"-də gəminin sükan şöbəsindəki texniki nasazlıq qəzaya səbəb olub. Bakıda aparılan təmir işləri nəticəsində bununla yanaşı, həm də qəza zamanı yaranan digər zədələr də aradan qaldırılıb.
Qəzaya məruz qalmış "Sarmat-1" haqqında həyəcan siqnalı 15 dekabrda Həştərxanda yerləşən Xilasetmə işlərini əlaqələndirən mərkəzdən daxil olub. "Sarmat-1" quru yük daşıyan gəmi 1986-cı ildə inşa olunub. Qəza zamanı xəsarət alan olmayıb.
Məqalə müəllifi ilə əlaqə ünvanı: [email protected]
