Azərbaycan, Bakı, 09 aprel / Trend /
Bakıda 14-17 apreldə "Ballast suların idarə olunmasının təşkili" ilə bağlı beynəlxalq seminar keçiriləcək. Məlumatı Dövlət Dəniz Administrasiyası yayıb. Seminar Azərbaycanın qoşulduğu beynəlxalq konvensiyalara uyğun olaraq keçiriləcək.
Seminarın başlıca məqsədi beynəlxalq dəniz daşımaları zamanı ətraf mühitin qorunması, gəmilər tərəfindən dənizlərin çirklənməsinin qarşısının alınması, dəniz bioloji mühitinin qorunması sahəsində təcrübə mübadiləsi və bu sferada olan təcrübənin təkmilləşdirilməsindən ibarətdir.
Seminarda Beynəlxalq Dəniz Administrasiyasının ekspertləri ilə yanaşı, Qazaxıstan, Türkmənistan, İran və Rusiyadan mütəxəssislər iştirak edəcək.
Seminarda Azərbaycan Fövqəladə Hallar, Ekologiya və Təbii Sərvətlər nazirliklərinin, Dövlət Xəzər Dəniz Gəmiçiliyinin, Bakı Beynəlxalq Dəniz Ticarəti Limaının, Xəzər Dənizi Neft Donanmasının və digər təşkilatların nümayəndələrinin iştirakı gözlənilir.