Azərbaycan, Bakı, 16 aprel / Trend , müxbir N.İsmayılova /
Ölkə prezidenti İlham Əliyev tərəfindən aprelin 14-də imzalanmış Azərbaycan regionlarının 2009-2013-cü illərdə sosial-iqtisadi inkişafı üzrə Dövlət Proqramında vergi və pul-kredit siyasəti üzrə tədbirlər nəzərdə tutulub.
Proqram çərçivəsində ədalətli rəqabət mühitinin formalaşdırılmasına istiqamətlənmiş tədbirlər davam etdiriləcək ki, bu tədbirlərin həyata keçirilməsi də İqtisadi İnkişaf və Vergilər nazirliklərin tapşırılıb. 2013-cü ilə qədər həmçinin vergi siyasəti və vergi dərəcələrinin optimallaşdırılması planlaşdırılır. Sahibkarlara göstərilən vergi xidmətlərinin yaxşılaşdırılması və onun əhatə zonasının genişləndirilməsi məqsədilə kompüter terminallarının yaradılması nəzərdə tutulub.
Sahibkarların kredit resurslarına çıxışının genişləndirilməsi məqsədilə qanunvericilik bazasının təkmilləşdirilməsi Mərkəzi Bank, eləcə də Maliyyə və İqtisadi İnkişaf nazirliklərinə həvalə edilib. Bank, sığorta və lizinq xidmətlərinin inkişafı, bankların regional filial şəbəkəsinin genişləndirilməsi də prioritet məsələlər arasındadır.
Mərkəzi Bank Rabitə və İnformasiya Texnologiyaları Nazirliyi ilə birlikdə poçt şəbəkəsi platformasında poçt əmanətləri və poçt hesablaşmaları sistemi qurmaq və bununla əlaqədar idarəedici hüquqi-təşkilati prosedurları müəyyən etməyi planlaşdırır.
Proqram çərçivəsində həyata keçirilən proqramların maliyyələşdirilməsi ölkənin dövlət büdcəsi, qeyri-büdcə fondları, mülkiyyət formasından asılı olmayaraq qurum, müəssisə və təşkilatlar, Sahibkarlığa Yardım Milli Fondu, Azərbaycan İnvestisiya Şirkəti, beynəlxalq təşkilatlar və xarici dövlətlər, həmçinin qanunvericiliyə zidd olmayan digər mənbələr tərəfindən yerinə yetiriləcək.
Məqalə müəllifi ilə əlaqə ünvanı: [email protected]
