Azərbaycan, Bakı, 23 aprel / Trend , müxbir N.İsmayılova /
"2009-cu ilin yanvar-mart aylarında Azərbaycan ÜDM-i ötən ilin analoji dövrünün göstəriciləri ilə müqayisədə 4,1 faiz artıb", - cümə axşamı Dövlət Statistika Komitəsindən deyilib. Hazırkı qiymətlərlə ÜDM 6,7 milyard manat təşkil edib. Adambaşına düşən ÜDM-in həcmi 2,9 faiz artaraq 782 manat (971,5 dollar) olub.
Əlavə dəyərin 38,5 faizi neft-qaz, 52,6 faizi qeyri-neft sektorunda, 8,9 faizi isə məhsul və idxaldan xalis vergilər hesabına yaradılıb. Qeyri-neft sektorunda yaradılmış əlavə dəyər ötən ilin analoji dövrü ilə müqayisədə 13,7 faiz artıb.
İqtisadiyyatın bütün sahələrində məhsul istehsalının ümumi həcmi 3 faiz artaraq ÜDM-in 58,7 faizini təşkil edib ki, onun da əsas hissəsi - 42,6 faiz (2,9 milyard manat) - sənayenin payına düşür. Xidmət sahəsində əlavə dəyər istehsalı ötən ilin analoji dövrü ilə müqayisədə 5,3 faiz artıb.
Birinci rübdə kənd təsərrüfatı, ovçu sektoru və meşəçilikdə 167,6 milyon manat əlavə dəyər istehsal olunub ki, bu da ümumi ÜDM-in 2,5 faizidir. Bu rəqəmlər tikinti sektorunda - 920 milyon manat (13,6 faiz), nəqliyyat - 617,8 milyon manat (9,2 faiz), rabitə və poçt xidmətləri - 132,5 milyon manat (iki faiz), topdan və pərakəndə satış, avtomobil, məişət avadanlıqları və özəl istifadə əşyalarının təmiri - 575,8 milyon manat (8,5 faiz), restoran və mehmanxana - 104,4 milyon manat (1,5 faiz), sosial və digər xidmətlərin göstərilməsi - 753,1 milyon manatdır (11,2 faiz).
Aprelin 23-nə olan rəsmi məzənnə 0,8035 AZN/USD təşkil edir.
Məqalə müəllifi ilə əlaqə ünvanı: [email protected]
