Azərbaycan, Bakı, 24 aprel / Trend , müxbir Ü.İsmayılova /
2009-cu ildə Azərbaycanın əmək bazarında əhəmiyyətli dəyişikliklər müşahidə olunmayıb. Bu barədə cümə günü Azərbaycanın əmək və əhalinin sosial müdafiəsi naziri Fizuli Ələkbərov "Sosial yardım, sosial reabilitasiya: davamlı inkişaf" adlı II Beynəlxalq elmi-praktik konfrans zamanı bildirib.
"Hətta məşğulluq idarələri tərəfindən həftəlik əsasda muzdla işləməyin mümkün olduğu dörd-beş yerdə aparılan monitorinqlərdə də dəyişikliklər nəzərə çarpmır", - deyə Ələkbərov bildirib.
Buna baxmayaraq, Əmək Nazirliyi yaşayış səviyyəsinin müəyyən edilməsi məqsədi ilə 18,5 min ev təsərrüfatında monitorinqlərin aparılmasına dair hökumətə təkliflər təqdim edib.
"Monitorinqlər kənd təsərrüfatı, hətta iqtisadiyyatın neft sektoru və digər sahələrə cəlb edilmiş əhali qruplarını əhatə edəcək. Və yalnız monitorinq nəticələrinin təhlilindən sonra əmək bazarının vəziyyəti barədə dolğun informasiya əldə edə bilərik", - deyə nazir bildirib.
Onun sözlərinə görə, dünya böhranının dərinləşməsinə və ölkələrdə onun təsirindən yaranan problemlərə baxmayaraq, Azərbaycanda əmək haqları artmaqdadır, lakin peşəkar kadr çatışmazlığı problemi hələ də qalır.
"Hazırda məşğulluq idarələri iqtisadiyyatın strukturu barədə bizə məlumat verirlər və biz hər bir vətəndaşı məktəb partasından müəyyən peşəyə yönəldəcək mexanizm hazırlamaq niyyətindəyik", - deyə Ələkbərov bildirib.
Beynəlxalq Əmək Təşkilatının (BƏT) məlumatına görə, Azərbaycanda işsizliyin səviyyəsi 0,4 faiz azalaraq 6,1 faizə çatıb. Bu hesablamalar BƏT-in metodologiyası əsasında hazırlanıb.
Məqalə müəllifi ilə əlaqə ünvanı: [email protected]