"Petrovetnam" və Azərbaycan şirkəti Vetnamda neft şalmının emalı üzrə İB yaradacaq
Azərbaycan, Bakı, 20 iyun / Trend /
Ekol mühəndislik xidmətləri QSC və Vetnamın Vunq Tau şəhərindəki Vimexco şirkəti əməkdaşlıq haqqında müqavilə imzalayıblar. Bu barədə "Ekol" QSC-dən bildirilib. Müqavilə QSC-nin nümayəndə heyətinin Vetnama səfəri çərçivəsində imzalanıb.
İmzalanmış müqaviləyə əsasən yaxın vaxtda işçi qrupunun yaradılması nəzərdə tutulub. Müqavilə Azərbaycan və Vetnam mütəxəssilərinin köməyi və bilavasitə iştirakı əsasında "Petrovetnam" və "Ekol" QSC tərəfindən İstehsalat Birliyinin yaradılmasını nəzərdə tutur. İB Vetnam ərazisində toplanmış neft şlamalarının, çirkab suların və sənaye tullantılarının emalı ilə məşğul olacaq. Müqavilədə Vetnamın neft sənayesində istifadə olunacaq avadanlıqların təchiz edilməsi, Bakıda xüsusi funksiyası olan yaşıllıqların salınması, Vunq Tau şəhərinin Bakı küçəsində "Bakı" adlı restoranın açılması məsələləri qeyd olunub.
"Ekol" QSC-nin baş direktoru Soltan Əliyevin əvvəlcədən bildirdiyi kimi, hazırda QSC-nin əsas məqsədi öz imkanlarını ixrac etmək, xarici sifarişlər qəbul etmək və xarici ölkələrdə öz işini qurmaqdır.
Apreldə Vimexco şirkətinin nümayəndə heyəti Bakıya rəsmi səfər edib və "Ekol" QSC tərəfindən həyata keçirilən bütün layihələri nəzərdən keçirib.
2006-cı ilin mart ayının 1-də Abşeron yarımadasında mövcud olan ekoloji problemlərin aradan qaldırılması məqsədilə yaradılan "Ekol mühəndislik Xidmətləri"nin həmtəsisçiləri ARDNŞ (51 faiz) və Lancer S.A Services-dir (49 faiz). Bu barədə ARDNŞ-ın rəsmi internet saytında deyilir.
