Azərbaycan, Bakı, 07 iyul / Trend , müxbir Ü.İsmayılova /
Azərbaycanın böyük sığorta şirkətlərindən biri MBASK avqustun 10-da şirkətin idarəetmə heyətinin yenidən strukturlaşdırılmasının müzakirəsi üçün səmdarların növbədənkənar iclasını keçirəcək. Bu barədə çərşənbə axşamı MBASK-in idarəetmə heyətinin sədri Cəmil Məlikov bildirib.
"Şirkətin yenidən strukturlaşdırılması 2009-cu ildə antiböhran tədbirləri çərçivəsində həyata keçirilir", - deyə Məlikov bildirib.
Onun sözlərinə əsasən, hazırda şirkətin idarəetmə heyətinin sədri vəzifəsinə namizədlik məsələsi müzakirə olunur. Məlikov Müşahidə Şurasının üzvü təyin olunacaq.
Növbədənkənar iclas çərçivəsində idarəetmə heyətinin, Direktorlar Şurasının tərkibinin dəyişdirilməsi, Direktorlar Şurası sədrinin əmək haqqının təsdiqlənməsi, aktivlərin yenidən strukturlaşdırılması və nizamnamə kapitalının artırılması məsələləri müzakirə ediləcək.
"İclasın əsas məsələsi həmçinin mümkün xərclərin azaldılması olacaq. Şirkət artıq işə yeni işçilər götürmür", - deyə Məlikov bildirib.
Azərbaycanın sığorta bazarında 1992-ci ildən fəaliyyət göstərən MBASK sığorta şirkəti 29 növ xidmət göstərir, onlardan dördü icbaridir. Şirkətin nizamnamə kapitalı iki milyon manat təşkil edir.
2005-ci ilin yanvar ayından MBASK şirkətinin səhmlərinin 30 faizi AYİB-ə məxsusdur.
Məqalə müəllifi ilə əlaqə ünvanı: [email protected]
