Azərbaycan, Bakı, 23 iyul / Trend , müxbir N.İsmayılova /
"İlin birinci yarısının yekunlarına əsasən, Kapital Bank-ın gəlirləri 32,2 milyon manat təşkil edib", - bankın məlumatında deyilir.
Bununla yanaşı, bankın xərcləri 24,4 milyon manat təşkil edib və bank ili 7,8 milyon manat gəlirlə başa vurub. Əldə olunan gəlir ötən ilin analoji dövrü ilə müqayisədə 47,2 faiz artıb.
Bankın aktivləri 356,7 milyon manat, öhdəlikləri - 270,6 milyon manat təşkil edib ki, bu da ötən ilin analoji dövrünün göstəricilərindən müvafiq olaraq 24,8 və 14 faiz çoxdur.
Əhalinin banka qoyduğu uzunmüddətli əmanətlərin məbləği 82,5 milyon manat olub. Bu, 30,1 faiz artım deməkdir. Bankın aktiv plastik kartlarının sayı 1,83 milyon təşkil edib ki, bu da ötən ilin analoji dövründəki göstəricidən 26,4 faiz çoxdur. Fəaliyyətdə olan bankomatların sayı 301, POS-terminalların sayı isə 407-yə çatıb.
Bankın səhmdarlarının strukturu hazırda aşağıdakı formadadır: Pasha Holding 97,5 faiz, 2400 bank əməkdaşı 2,5 faiz səhmə malikdir.
Bu gün bank bütün respublika üzrə 87 filial, filialların tabeliyində iki müstəqil bölmə və 97 şöbə (kassa), həmçinin 12 valyuta dəyişmə məntəqəsinə malikdir. Gələcəkdə bank öz fəaliyyətini Azərbaycan sərhədlərindən kənarda da genişləndirmək və MDB ölkələrində iki nümayəndəlik açmaq niyyətindədir.
İyulun 23-nə olan rəsmi məzənnə 0,8041 AZN/USD təşkil edir.
