Azərbaycan, Bakı, 06 avqust / Trend , müxbir N.İsmayılova /
Azərbaycan İqtisadi İnkişaf Nazirliyi yanında Sahibkarlığa Kömək Milli Fondu (SKMF) hər birinin gücü iki min ton olan, meyvə, tərəvəz və digər ərzaq məhsullarının saxlanılması və satışı üçün soyuducu anbar komplekslərinin yaradılması üzrə tender çərçivəsində üç investisiya layihəsinin maliyyələşdirilməsinə başlayıb. Bu barədə nazirlikdən məlumat verilib.
Məlumatda deyildiyinə görə, səlahiyyətli kredit təşkilatları vasitəsilə artıq Aran rayonunda iki, Gəncə-Qazax rayonunda bir layihənin maliyyələşdirilməsi üçün güzəştli kredit verilib.
Fondun vəsaiti hesabına Quba-Xamaz rayonunda 6, Aranda 4, Gəncə-Qazax və Lənkəran iqtisadi rayonlarında isə bir layihə maliyyələşdiriləcək.
Seçilmiş layihələr həm sahibkarların şəxsi vəsaiti, həm də Milli Fondun güzəştli kreditləri (investisiya layihələrinin dəyərinin 70 faizə qədərinin dövlət vəsaiti hesabına maliyyələşməsi barədə qərar qəbul edilib) hesabına maliyyələşəcək. Hətta Azərbaycanın investisiya şirkətləri və ya onların törəmə strukturları da maliyyələşmədə iştirak edə bilərlər.
Bəyənilmiş layihələrin ümumi dəyəri 40 milyon manatdan çoxdur. Fond bu layihələrin ümumi dəyərindən 24 milyon manata qədərini maliyyələşdirməyi qərara alıb.
Avqustun 6-na olan cari məzənnə 0,8041 AZN/USD təşkil edir.
Məqalə müəllifi ilə əlaqə ünvanı: [email protected]
