Azərbaycan, Bakı, 26 avqust / Trend , müxbir Ü.İsmayılova /
Bakının avtomobil bazarında iyulda yay mövsümünə xarakterik olan passivlik müşahidə olunub. Bu barədə "Əmlak Bazarı İştirakçıları" İctimai Birliyindən məlumat verilib. İyulda bazarda təklifin 4,8 faiz artması, tələbin isə 2,2 faiz azalması qeydə alınıb.
Ötən ay həmçinin avtomobil alış-satışında əqdlərin 3,1 faiz azalması da müşahidə olunub. Bakı bazarında iyulda avtomobillərin orta qiyməti 16,24 min dollar təşkil edib. Avtomobil bazarında passivlik avtomobillərin ekspozisiya müddətinə də təsir edib. Ekspozisiya müddəti üç gün artaraq 95 günə çatıb. Bu da öz növbəsində risklərin artmasına və bazarın likvidliyinin azalmasına gətirib çıxarıb. Ötən ay bazarda 6,89 min avtomobil təklif olunub. Onlardan yalnız 39,1 faizi iyulda təklif olunub. Qalan 60,9 faiz əvvəlki aylardan qalıb.
Bakının avtomobil bazarı portfelinin böyük hissəsini əvvəllərdə olduğu kimi, "Mersedes Benz" markalı avtomobillər təşkil edib (36,9 faiz). Bu göstərici iyuna nisbətən 10 faiz artıb. Ümumilikdə Bakının avtomobil bazarı portfelinin 82,4 faizini dünyanın doqquz aparıcı avtomobil markası təşkil edib. Qalan 17,6 faizi dünyanın təxminən 20 istehsalçısının avtomobilləri təşkil edib.
Məqalə müəllifi ilə əlaqə ünvanı: [email protected]
