Azərbaycan, Bakı, 14 sentyabr / Trend , müxbir Ü.İsmayılova /
Azərbaycanın Standartlaşdırma, Metrologiya və Patent üzrə Dövlət Komitəsi ölkədəki "Bureau Veritas Azeri" MMC sertifikasiya təşkilatının fəaliyyət icazəsinin geri alınması qərarına yenidən baxıb, bu barədə Dövlət Komitəsinin bazar ertəsi yayılan məlumatında deyilir.
Dövlət Komitəsi təşkilatın fəaliyyətinə verilən icazəni aparılan yoxlamaların nəticəsinə əsasən avqustun 11-də geri alıb.
Aparılan yoxlamalar zamanı Bureau Veritas Azeri şirkətində ISO 9001:2000 tələblərinin ciddi şəkildə pozulması halları və milli və beynəlxalq sertifikasiya sistemi tələblərinə cavab verən əsas sənədlərin olmaması müəyyən edilib. Bu sənədlər təşkilatların ISO/MEK 17021standartları üzrə keyfiyyətin idarə edilməsi sisteminin qiymətləndirilməsinin aparılması zamanı sertifikasiya orqanının fəaliyyəti üçün vacibdir.
Dövlət Komitəsi şirkətin rəsmi müraciəti əsasında əlavə yoxlamaların keçirilməsindən sonra öz qərarına yenidən baxıb. Yoxlamalardan sonra əvvəlcə aşkar edilən problemlərin aradan qaldırılması müəyyən olunub.
Məqalə müəllifi ilə əlaqə ünvanı: [email protected]
