Türkmənistan, Aşqabad, 05 oktyabr / Trend , müxbir H.Həsənov/
Tükmənistan Prezidenti Qurbanqulu Berdimuhammedov tikilməkdə olan obyektlərə, xüsusilə də görülən işlərin müddətinə və işin keyfiyyətinə nəzarət etmək üçün müvafiq orqanlara tapşırıqlar verib.
Rəsmi türkmən mənbəsindən verilən məlumata görə, ölkə başçısı bu barədə hökumətin son iclası zamanı tapşırıq verib.
Berdimuhammedov deyib ki, dövlət orqanları bütün müqavilə öhdəliklərinin yerinə yetirilməsinə, o cümlədən layihələrin həyata keçirilməsinin müddətinə və işin keyfiyyətinə nəzarət etməlidirlər.
Onun sözlərinə görə, bu şərtləri yerinə yetirməyən vəzifəli şəxslər qanun qarşısında cavab verəcəklər.
Türkmənistan paytaxtında xarici şirkətlərlə müqavilə əsasında bir sıra obyektlərin tikintisi həyata keçirilir. Dövlət idarələrinin tikintisi ilə əsasən Fransa şirkəti "Buiq", yaşayış və ticarət mərkəzlərinin tikintisi ilə isə əsasən türk şirkətləri məşğul olurlar.
Bu gün Berdimuhammedov bir sıra ticarət mərkəzlərinin tikintisi sifariş olunan 5M İnşaat Tekstil, ERQ İnşaat, Sumer, Şahin və Polimeks kimi türk şirkətləri ilə müqavilələri dəstəkləyib.
Məqalə müəllifi ilə əlaqə ünvanı: [email protected]
