Türkmənistan, Aşqabad, 31 oktyabr/ Trend , müxbir, H.Həsənov/
Türkmənbaşıda dəniz limanının texniki cəhətdən yeniləşməsi və yenidən qurulmasında onlarla xarici şirkət iştirak etmək niyyətlərini bildiriblər.
"Altın Asır" milli telekanalının məlumatına görə, Türkmənistan Prezidenti Qurbanqulu Berdıməhəmmədov təqdim edilən layıhələrlə tanış olub, onların tamamlanması üzrə bir sıra konkret fikir və təkliflər verib.
Ekspertlərin qiymətləndirməsinə görə, tam miqyaslı yenidənqurma işləri bir neçə milyard dollarlıq sərmayə qoyuluşunu tələb edir. Təxirəsalınmaz məsələlərin tərkibinə - istənilən növ və yükqaldırma imkanına malik gəmilər qəbul edə bilən çoxfunksiyalı yeni dəniz terminallarının tikintisi və müvafiq olaraq güclü yüklənib-boşalma avadanlığı ilə təchiz olunmuş idxal-ixrac əməliyyatlarının yerinə yetirilməsi və tranzit yüklərin saxlanması və emalı üçün anbarların tikilməsi də aiddir.
"Beynəlxalq Terkmənbaşı limanı Türkmənistanın müasir nəqliyyat-rabitə infrastrukturunda mühüm yer tutan, ölkənin uğurlu sosial-iqtisadi inkişafı və beynəlxalq əlaqələr sisteminə inteqrasiyasını təmin etməyə malik limandır", - Berdıməhəmmədov hökumət müşavirəsində deyib.
Dəniz yükdaşımaları Türkmənistanın xarici iqtisadi əlaqələrində daha böyük əhəmiyyət kəsb etməyə başlayıb. Xəzərin limanında emal olunan yüklərin həcmi getdikcə artır və bu yolla ölkəyə sənaye və kənd təsərrüfatı avadanlıqları, avtonəqliyyat texnikası, metal məmulatları, taxta-şalban, mineral gübrələr gətirilir, xaricə isə polipropilen, koks və digər neft məhsulları, kimya və tikinti sənayesi məhsulları göndərilir.
Türkmənistan mətbuatının məlumatına görə, Avropa-Qafqaz-Mərkəzi Asiya beynəlxalq nəqliyyat dəhlizinin böyük tranzit qovşağı funksiyasını yerinə yetirən bu liman mühüm dəyişikliklər astanasındadır.
