Azərbaycan, Bakı, 17 noyabr / Trend , müxbir N.İsmayılova/
Oktyabrın 1-nə olan vəziyyətə görə, Azərbaycanda 44,4 faizi qadın olmaqla 42,2 min nəfər işsiz rəsmi qeydiyyatdan keçib. Bu barədə çərşənbə axşamı Dövlət Statistika Komitəsindən verilən məlumatda deyilir. 10 ay ərzində işsizlərin sayı 5,13 faiz azalıb. Ölkədə bir boş yerə 4 nəfər işsiz düşür.
Hesabat dövrü ərzində ölkədə məşğul əhalinin sayı 4330 min nəfər təşkil edib. Bununla yanaşı, cari ilin yanvar-sentyabr aylarında muzdla çalışan 1375,4 min nəfər qeydiyyatdan keçib.
İstehsalat sahələrində muzdla çalışan işçilərin 12,1 faizi sənaye sahəsində, 4,9 faizi inşaatda, 2,8 faizi meşə, kənd təsərrüfatında və balıqçılıq sahəsində fəaliyyət göstərir. Xidmət sahəsində muzdla çalışan işçilərin 25,5 faizi təhsil sahəsində, 19,6 faizi topdan və pərakəndə satış sahəsində, avtomobil təmiri sahəsində, 10,2 faizi səhiyyə və sosial xidmətlər sahəsində, 6,8 faizi nəqliyyat və rabitədə, 6,3 faizi kommunal, sosial sahədə, 5 faizi daşınmaz əmlakla əməliyyatlar sahəsində, 4,1 faizi dövlət idarələri, müdafiə sahəsində, 2,6 faizi isə digər sahələrdə fəaliyyət göstərir.
Yanvar-sentyabr aylarında iqtisadi fəaliyyətlə məşğul olan xarici vətəndaşların sayı 5 min nəfər təşkil edib ki, bunlardan da 1,4 min nəfəri sənayedə, 1,5 min nəfəri inşaatda, 0,7 min nəfəri daşınmaz əmlak ilə əməliyyatlarda, 0,5 faizi ticarətdə, 0,4 faizi təhsil sahəsində, 0,5 faizi isə digər sahələrdə fəaliyyət göstərir.
İşsizlər üçün maddi yardımın orta məbləği 176,3 manatdır.
Noyabrın 17-nə olan cari məzənnə 0,8028 AZN/USD təşkil edir.
Məqalə müəllifi ilə əlaqə ünvanı: [email protected]
