Azərbaycan, Bakı, 18 noyabr / Trend , müxbir Ü.İsmayılova/
Azərbaycanda oktyabrın 1-nə olan vəziyyətə görə pensiyaçıların sayı 1,298 milyon nəfər təşkil edib. Bu barədə Dövlət Statistika Komitəsi çərşənbə günü məlumat verilib.
Pensiyaçıların ümumi sayının 65%-i yaşa görə, 14%-i əliliyə görə, 11%-i isə ailə başçısını itirdiyinə görə pensiya alır.
Statistika Komitəsindən həmçinin məlumat veriblər ki, 9 ay ərzində 14% pensiyaçıya ilk dəfə pensiya verilməsi rəsmiləşdirilib.
Azərbaycanda orta pensiya məbləği 99,93 manat təşkil edir ki, bu da ötən ilin yanvar-sentyabr aylarındakı göstəricidən 5% çoxdur və ölkədə orta aylıq əməkhaqqının 34%-ni təşkil edir.
9 ay ərzində Sosial Müdafiə Fondu ölkədə pensiyaların maliyyələşməsi üçün 1,1169 milyard manat ayırıb ki, bu məbləğ də 2008-ci ilin doqquz ayı ilə müqayisədə 220,8 milyon manat və ya 23,3% çoxdur.
Bu dövr ərzində əhaliyə 33,8 milyon manat sosial yardım ayrılıb. Bu məbləğdən 12,6 milyon manatı hamiləlik və uşaq doğulmasına görə, 10,8 milyon manat əmək qabiliyyətinin itirilməsinə görə, 5,8 milyon manat dəfn xərclərinə, 4,6 milyon manat isə digər sosial yardımların ödənilməsinə yönəldilib.
Əmək və Əhalinin Sosial Müdafiəsi Nazirliyinin məlumatına görə, oktyabrın 1-nə olan vəziyyətə görə ölkədə 151,6 min ailə və ya 691,1 min nəfər ünvanlı sosial yardım (ÜSY) alıb. Onlardan 351,3 min nəfəri qadınlar, 339,3 min nəfəri isə uşaqlardır. Adambaşına düşən orta aylıq ÜSY-nin həcmi 23,43 manat təşkil edib.
Noyabrın 18-nə olan rəsmi məzənnə 0,8029 AZN/USD təşkil edir.
Məqalə müəllifi ilə əlaqə ünvanı: [email protected]