Azərbaycan, Bakı, 18 fevral / Trend , müxbir Ü.İsmayılova/
Fevralın 1-nə olan məlumata görə, Azərbaycanın iri lizinq şirkətlərindən biri olan AGLeasing-in portfeli 6,362 milyon manat təşkil edib. Bu barədə şirkətdən bildirilib.
Bu dövr ərzində qüvvədə olan lizinq müqavilələrinin ümumi sayı 140, lizinq avadanlıqlarına ayrılmış ümumi məbləğ isə 9,621 milyon manat təşkil edib.
Lizinq portfelinin həcminə görə AGLeasing Azərbaycanın qabaqcıl lizinq şirkətlər qrupuna daxildir. Şirkətin müştəriləri həm hüquqi, həm də fiziki şəxslər olan sahibkarlardır.
AGLeasing 2005-ci ildə dörd təsisçi tərəfindən yaradılıb. Şirkətin nizamnamə kapitalı bir milyon manat təşkil edir. Şirkət əsasən üç sahədə - nəqliyyat, ticarət və tibbi avadanlıqları lizinqə verir. Şirkət avadanlıqları lizinqə 60 ay müddətinə, 20 faizdən 50 faizədək ilkin ödənişlə, 20-24 faiz dərəcəsi ilə verir.
AGBankın işgüzar iştirakı 35 faiz, İngiltərənin Hiperion Capital Management şirkəti 30 faiz, ABŞ-ın Delta Trans LLC şirkəti 25 faiz və İngiltərənin Milio Leasing Limited şirkəti 10 faiz təşkil edir.