Azərbaycan, Bakı, 12 aprel /Trend, müxbir N.İsmayılova/
Azərbaycan Mərkəzi Bankı (AMB) "Bank of Azerbaijan"ın bank fəaliyyəti üçün lisenziyasının ləğv olunması barədə məlumatları təkzib edib. Bunu bazar ertəsi AMB-nin Kredit təşkilatlarının fəaliyyətinə nəzarət departamentinin rəhbəri Rəşad Orucov deyib.
"Bank of Azerbaijan"ın lisenziyası ləğv olunmayıb çağırılmayıb, bu məsələ müzakirə predmeti deyil və Mərkəzi Bankın gündəliyində deyil. Bank öz fəaliyyətini adi rejimdə davam etdirir", - Orucov bildirib.
Bundan əvvəl Mərkəzi Bank kommersiya bankındakı problemlər haqqında şayiələri daxili idarəetmə sistemi ilə əlaqələndirmişdi. "Son vaxtlar bank zərərlə işləyib və bu səbəbdən kapital itkisi baş verib. Lakin bank rəhbərliyi dəyişdirilib. Yeni komanda bankın fəaliyyətinin optimallaşdırılması üzrə iş aparır", - bundan əvvəl AMB sədrinin birinci müavini Alim Quliyev demişdi.
Hazırda bankın ümumi aktivlərinin həcmi 144 milyon manatdan çox, nizamnamə kapitalı isə 15 milyon manat təşkil edir. 2010-cu ildə "Bank of Azerbaijan"ın nizamnamə kapitalı 25 milyon manata kimi artırılacaq.
Bank ölkənin bank bazarında 1993-cü ilin dekabrından fəaliyyət göstərir.
Aprelin 12-nə olan rəsmi məzənnə 0,8035 AZN/USD təşkil edir.