Аzərbaycan, Bakı, 11 may /Trend/
Azərbaycanın Nəqliyyat Nazirliyi Cənubi Qafqazda nəqliyyat sektorunun perspektivlərinə dair mayın 12-13-də Tbilisidə keçiriləcək müşavirədə iştirak edəcək. Bu barədə çərşənbə axşamı nazirliyin məlumatında deyilir.
Müşavirədə Azərbaycanı nəqliyyat nazirinin müavini Musa Pənahovun rəhbərlik edəcəyi nümayəndə heyəti təmsil edəcək.
Keçiriləcək müşavirədə əsas məqsəd milli inkişaf proqramı ilə donorlar tərəfindən maliyyələşdirilən layihələrin təkmilləşdirilməsidir. Müşavirə zamanı yolların istismara verilməsinin təşkili və maliyyələşdirilməsi, həmçinin onların tikilməsində keyfiyyətin təminatı məsələləri müzakirə olunacaq.
Müşavirədə Asiya İnkişaf Bankı, Qara dəniz Ticarət və İnkişaf Bankı, Dünya Bankı, ATƏT, Avropa Yenidənqurma və İnkişaf Bankı, Avropa Komissiyası, Avropa İnvestisiya Bankı və digər şirkətlərin nümayəndələri iştirak edəcəklər. Həmçinin hər üç Cənubi Qafqaz ölkəsinin İqtisadi İnkişaf və Nəqliyyat nazirliklərinin, yol administrasiyası və dəmiryol nəqliyyatı nümayəndələrinin iştirakı gözlənilir.
