Аzərbaycan, Bakı, 7 iyun /Trend, müxbir Ü.İsmayılova/
Azərbaycanda II beynəlxalq sığorta forumunun keçirilməsi ləğv olunub, - bu barədə bazar ertəsi Azərbaycan Sığortaçılar Assosiasiyasının icraçı-direktoru Qafar Məcidov deyib.
"Forumun keçirilməsi sponsor dəstəyi olmadığına görə ləğv edilib", - Məcidov deyib. 2009-cu ildə də maliyyələşdirmə ilə bağlı problemlərə görə forum baş tutmamışdı.
Onun sözlərinə görə, forumun ləğv olunmasının daha bir səbəbi görüşdə iştirak etmək üçün gələn ərizələrin kifayət qədər olmamasıdır.
I Azərbaycan beynəlxalq sığorta forumu 2008-ci ilin 10-11 iyulunda Bakıda təşkil edilmişdi və ölkənin sığorta bazarının inkişaf tendensiyaları, Azərbaycanın sığorta sahəsində Avropa sığortaçılarının təcrübəsinin tətbiq edilməsi, sığorta həyatının inkişafı və sığortalaşdırmada korporativ idarəetmənin analizinə həsr olunmuşdu.
Forumda Polşanın Təkrar Sığorta Cəmiyyətinin nümayəndələri,"SFS" şirkətləri, "Rusiya" Sığorta Cəmiyyəti, Köln Sığorta Səhmdar Cəmiyyətinin Moskvadakı nümayəndəliyi, "Allianz" QSC, "İnqosstrax" və başqa şirkətlər iştirak etmişdi.
Azərbaycan Sığortaçılar Assosiasiyası 2006-cı ilin dekabrında təsis edilib. Assosiasiyanın tərkibinə bütün fəaliyyətdə olan sığortaçılar daxildir.Təşkilatın Müşahidə Şurasına Azərbaycanın beş sığorta şirkəti - MBASK, "Standard İnsurance", Beynəlxalq Sığorta Şirkəti, "Azərisığorta", "Atəşgah" daxildir.
