Azərbaycan, Bakı, 15 iyul /Trend, müxbir İ.Xəlilova/
İlin birinci yarısında Azərbaycanda sənaye istehsalının həcmi (məhsul istehsal edilib və sənaye xarakterli xidmət göstərilib) 14,2 milyard manat təşkil edib ki, bu da 2009-ci ilin müvafiq dövr göstəricisindən 3,5 faiz çoxdur.
Hesabat dövründə hasilat sənayesinin istehsal həcmi bütün istehsalın 77,5 faiz xüsusi çəkisində olmaqla 2,1 faiz artaraq 10,969 milyard manat təşkil edib. Emal sənayesinin xüsusi çəkisi 17,2 faiz (5,2 faiz artımla), elekrtik enerjisinin, qaz sektorunun - 4,8 faiz (2,9 faiz artımla) və su sektorunun - 0,5 faiz (3,1 faiz artımla) təşkil edib.
Hesabat dövründə Azərbaycan Beynəlxalq Əməliyyat Şirkəti (ABƏŞ) tərəfindən hasil edilən neftin həcmi 2,8 faiz artaraq 21,1 milyon ton, təbii qaz hasilatı isə dörd faiz azalarq 5,3 milyard kubmetr təşkil edib.
Yanvar-iyunda özəl sektorun payı 2,2 faiz artaraq ümumi sənaye istehsalının 82,1 faizini təşkil edib. Bununla yanaşı, 93,4 faiz sənaye mallarının, 6,6 faiz sənaye xarakterli xidmətlərin payına düşür. Neft sektorunda məhsul istehsalı 15,3 faiz artaraq 2,4 milyard manata çatıb.
Emal sənayesinin istehsal həcmi 2 440,8 milyon manat təşkil edib. İlin birinci yarısında avtomobil istehsalında, qoşqu və yarımqoşquların (42,4 dəfə), maşın və avadanlıqların (98,1 faiz), kimya sənayesində (55,2 faiz), metallurgiya sənayesi (39,4 faiz), elektrik avadanlığı istehsalında (36,4 faiz) artım müşahidə edilib.
Ərzaq mallarının istehsalı yalnız 2,5 faiz artıb. Bununla yanaşı, şəkər və şəkər tozu istehsalı 4,2 faiz, pendir və kəsmik 2 faiz artaraq 21,7 min ton, ət 3,9 faiz (123,2 min ton), süd 3 faiz (317,8 min ton), şit yağı 0,9 faiz (10,5 min ton), cem və marmelad 8 faiz (3,4 min ton), bitki yağları 31,4 faiz (23,1 min ton) artıb.
İyulun 15-nə olan rəsmi məzənnə 0,8037 AZN/USD təşkil edir.
