Azərbaycan, Bakı, 13 avqust /Trend, müxbir N.İsmayılova/
Yanvar-iyulda Azərbaycanda istehsal olunmuş ümumi daxili məhsulun (ÜDM) həcmi ötən ilin analoji dövrü ilə müqayisədə 3,5 faiz və ya 649,6 milyon manat artıb. Bu barədə cümə günü Dövlət Statistika Komitəsindən verilən məlumatda deyilir. Cari qiymətlərdə ÜDM göstəricisi 23,2 milyard manat olub. Əhalinin adambaşına düşən ÜDM-in həcmi 2599,7 manat (3235,5 dollar) təşkil edərək 2,3 faiz artıb. Əlavə dəyərin 6,2 faizi məhsullardan xalis vergi və idxalın hesabına yaranıb.
İqtisadiyyatın bütün sahələrində məhsul istehsalının ümumi həcmi 2 faiz artaraq, ÜDM-in 66,7 faizini təşkil edib. ÜDM-də 55,5 faizlik (12,8 milyard manat) əsas hissə sənayenin payına düşür. Xidmət sahəsində əlavə dəyər istehsalı ötən ilin analoji dövrü ilə müqayisədə 5,9 faiz artaraq ÜDM-in 27,1 faizini təşkil edib.
Yanvar-iyulda kənd təsərrüfatı, ovçuluq sektoru və meşəçilikdə 991,9 milyon manatlıq əlavə dəyər istehsal olunub ki, bu da ümumi ÜDM-in 4,3 faizini təşkil edir. Tikinti sektorunda 1,6 milyard manat (6,9 faiz), nəqliyyat sektorunda 1,5 milyard manat (6,6 faiz), rabitə və poçt xidmətləri sektorunda 1,6 milyard manat (7 faiz), topdan və pərakəndə ticarət, avtomobil sahəsində, məişət məhsulları və şəxsi istifadə əşyalarının təmiri üzrə xidmət sahələrində 636,6 milyon manat (6,7 faiz), iaşə müəssisəsi və mənzilin təşkilində 105,9 milyon manat (1,1 faiz), sosial və digər xidmətlərin göstərilməsində 885,4 milyon manat (9,3 faiz) əlavə dəyər istehsal olunub.