Azərbaycan, Bakı, 17 avqust /Trend, müxbir N.İsmayılova/
Ölkənin Mərkəzi Bankı yanında fəaliyyət göstərən Azərbaycan İpoteka Fondunun xətti ilə ipoteka kreditləşməsinin bərpası anından, 2009-cu ilin iyunun 1-dən "Bank Standard" banka mənzil alışı kreditinə görə ərizə ilə müraciət edən 357 vətəndaşdan 265-nə müsbət cavab verib. Bu barədə çərşənbə axşamı bankdan bildiriblər.
Verilən kreditlərin ümumi məbləği 9 milyon manat təşkil edib. Ümumi saydan 8,4 milyon manat məbləğində 204 kredit kommersiya xidmətlərinə, 600 min manat məbləğində 18 kredit isə güzəştli ipotekadır.
Hazırda ölkədə AİF xətti ilə ipoteka kreditləri 3 ildən 25 ilədək müddətə 50 min manatdan çox olmamaqla verilir. Bu kreditlər üzrə faiz dərəcəsi ildə 8 faizi ötmür.
AİF-in şərtlərinə görə, Azərbaycanda adi ipotekanın verilməsinin maksimum həddi 50 min manat təşkil edir və səkkiz faiz dərəcə ilə 25 il müddətinə verilir. Sosial ipoteka 35 min manat təşkil edir və dörd faiz dərəcə ilə 30 il müddətinə verilir. Adi və güzəştli kreditlər üçün ilkin ödəniş 15 faizdir.
2010-cu ilin iyununda "Bank Standard" "ABU Park" yaşayış kompleksi ilə birlikdə rəqabət qabiliyyətli faiz dərəcələri (ildə 12,5 faiz) ilə və 25 il müddətə nəzərdə tutulan ipoteka kreditləşməsi üzrə xüsusi kommersiya proqramı həyata keçirib.
AİF 2005-ci ilin dekabr ayında yaradılıb. 2006-cı ilin martından ipoteka kreditlərinin verilməsinə başlanılıb. İyulun 1-nə olan məlumata görə, Azərbaycanda AİF-in xətti ilə 52,1 milyon manat məbləğində kredit verilib. Bu göstərici cari ilin iyun ayında 41,7 milyon manat olub. İpoteka kreditləşməsinin şərtləri bunlardır: kreditlər milli valyuta - manatla və yalnız Azərbaycan vətəndaşlarına verilir; ipotekanın obyekti yalnız mənzil və şəxsi ev ola bilər; ipoteka kreditləşməsinin məbləği bazar qiymətlərinin 85 faizini keçməməlidir; kredit üzrə aylıq ödəmə borc götürənin aylıq gəlirinin 70 faizini keçməməlidir; həyat sığortasının məbləği ipoteka kreditindən çox olmalıdır və s.
Güzəştli şərtlər şəhid, milli qəhrəmanlar və məcburi köçkün ailələrinin üzvlərinə, ən azı, üç il iş təcrübəsi olan dövlət qulluqçularına, elmlər namizədləri və doktorluq dərəcəsi olanlara, idman sahəsində xüsusi xidmətləri olan şəxslərə, həmçinin, maksimum üç il xidmət stajı olan hərbçilərə şamil edilir.
Güzəştli ipoteka krediti alan hər ailə bundan yalnız bir dəfə istifadə edə bilər.
Avqustun 17-nə cari məzənnə 0,8038 AZN/USD təşkil edir.
