Azərbaycan, Bakı, 21 avqust /Trend, müxbir N.İsmayılova/
Azərbaycanın Əmlak Məsələləri Dövlət Komitəsi Baki Məişət Maşınları Səhmdar Cəmiyyətinin səhmlərinin satışı üzrə investisiya müsabiqəsi elan edib. Müəssisə universal məişət maşınlarının istehsalı və satışı ilə məşğul olur. Bu barədə şənbə günü Dövlət Komitəsindən bildirilib.
Satışa müəssisənin 99,67 faizlik səhm paketi çıxarılıb ki, bunun da 85 faizi investisya müsabiqəsinin standart səhm paketini, 14,67 faiz isə əmək kollektivinə güzəştlə satılan səhmlərin yerdə qalan hissəsini təşkil edir.
Müsabiqədə Azərbaycanın həm fiziki, həm də hüquqi şəxsləri, eləcə də xarici sərmayədarlar iştirak edə bilərlər.
İddiaçılar yeni texnologiyaların tətbiqi, istehsal edilən məhsulun keyfiyyətinin yaxşılaşdırılması, istehsal gücünün və məhsulun çeşidlərinin artırılmasına dair təkliflərlə investisiya proqramı təqdim edə bilərlər.
Müsabiqədə iştirak etmək istəyənlər investisiya təkliflərinin beş faizi dəyərində bank zəmanəti təqdim etməli və dövlət büdcəsinə 850 min manat keçirilməsi, eləcə də 100 mindən az olmayan özəlləşdirmə çekinin silinməsi təklifi ilə müraciət etməlidirlər. Xarici sərmayədarlar da özəlləşdirmə opsionları təqdim etməlidirlər.
Bakı məişət maşınları universal məişət maşınlarının istehsalı və satışı ilə məşğul olur. Müəssisə Bakının Nərimanov rayonunda yerləşir.
SC-nin nizamnamə kapitalı 4,528 milyon manatdır və bu məbləğ üzrə hər birinin nominal dəyəri iki manat olmaqla 2 263 874 səhm buraxılıb. Müsabiqənin predmeti ümumi dəyəri 4,513 milyon manat olan 2 256 428 səhmdir.
Avqustun 1-nə olan vəziyyətə görə, müəssisənin 533,85 min manat borcu var, bununla yanaşı xammal, xidmətlər və iş üzrə borclar 236,64 min manat, əmək haqlarının ödənilməsi üzrə borclar - 297,21 min manat təşkil edir. Müəssisənin debitor borcları 4 615 manatdır. Müəssisə 1985-ci ildə istismara verilib.
İddiaçılar müsabiqənin tələbləri və özəlləşdirmə planı ilə tanış ola bilərlər. Əlavə məlumat almaq üçün 2010-cu il 20 sentyabr saat 10:00-dan 17:30-dək Bakı şəhəri, Y.Səfərov küçəsi, 20 ünvanından ala bilərlər. Sənədlər və təkliflər 20 sentyabr saat 10:00-dan 17:30-dək qəbul ediləcək.
Təkliflərə 2010-cu il 22 sentyabr saat 10:30-da Dövlət Komitəsinin binasında müsabiqə komissiyası tərəfindən baxılacaq.
Avqustun 21-də rəsmi məzənnə 0,8038 AZN/USD təşkil edir.