Аzərbaycan, Bakı, 28 avqust /Trend, müxbir N.İsmayılova/
Azərbaycan banklarının ümumi aktivləri 2010-cu il avqustun 1-nə olan məlumatlara əsasən 11,82 milyard manat təşkil edib ki, bu da iyulun əvvəlində olan göstəricidən üç faiz az və cari ilin əvvəlindəki göstəricidən 1,3 faiz çoxdur. Bu barədə Azərbaycan Mərkəzi Bankından verilən məlumatda deyilir.
İnvestisiya qoyuluşu avqust ayında 0,4 faiz artaraq 895,2 milyon manat, müştərilərə verilən kreditlər isə 8156,28 milyon manat (2,3 faiz azalaraq) təşkil edib. Ölkənin maliyyə sektoruna verilən kredit və depozitlərin həcmi 4,5 faiz azalaraq 500,34 milyon manat təşkil edib.
Hesabat dövrü ərzində müxbir hesabda olan vəsaitlər 23,2 faiz azalaraq 727,67 milyon manat təşkil edib. 2010-cu il avqustun 1-nə olan məlumatlara görə, Azərbaycan banklarının şəxsi vəsaitləri 10,1 faiz artaraq 463,1 milyon manat təşkil edib.
2010-cu il avqustun 1-də Azərbaycan banklarının ümumi öhdəlikləri iyul ayına nisbətdə 3,7 faiz azalaraq 9 milyard 745,36 milyon manat təşkil edib. Onun 4 milyard 318,81 milyon manatı depozitlər, 4 milyard 841,47 milyon manatı isə kreditlər və depozitlər üzrə maliyyə bazarından alınan məbləğə aiddir.
Avqustun 28-nə olan rəsmi məzənnə 0,8037 AZN/USD təşkil edir.