Azərbaycan, Bakı, 28 sentyabr /Trend, müxbir İ.Xəlilova/
İslam İnkişaf Bankının (İİB) maliyyələşməsində iştirak etdiyi iki yeni layihənin həyata keçirilməsinin icmalı üçün Bakıya layihələr üzrə məsul şəxs Məhəmməd Əli Səidin başçılıq etdiyi bankın missiyası gəlib. Bu barədə çərşənbə axşamı İİB-nin Bakı ofisindən bildiriblər.
"O, Azərbaycana səfəri çərşənbə gününə planlaşdırılan İİB-nin regional direktoru Hişam Marufa qoşulacaq", - bankdan bildiriblər.
Ölkədə həftənin sonunadək olacaq missiyanın əsas vəzifəsi bankın maliyyələşməsinə 134,4 milyon avro ayırdığı 800 meqavat gücə malik yeni "Cənub" stansiyasının və məişət tullantılarının yandırılması üzrə zavodun tikinti layihələrinin (150 milyon avro) həyata keçirilməsinin gedişi ilə tanışlıqdan ibarətdir.
Birinci layihə üzrə kredit sazişi ötən ilin dekabrında, ikinci layihə üzrə 2010-cu ilin iyununda baş tutub.
Məişət tullantılarının yandırılması zavodunun tikintisinə bank kredit resurslarını üç il güzəştli olmaqla 18 il müddətinə verib. Bu vəsaitlər avadanlığın alınması üçün nəzərdə tutulub.
Zavodun tikintisinin ümumi dəyəri 346 milyon avro dəyərində qiymətləndirilir. Onun 36 ay ərzində tikilməsi planlaşdırılıb. Tikinti işlərinin maliyyələşdirilməsi hazırda büdcə vəsaitləri hesabına aparılır.
Tikintinin podratçısı qismində Fransanın CNIM şirkəti çıxış edir. Şirkət bu sahədə böyük təcrübəyə malikdir. O, dünyada məişət tullantılarının yandırılması üzrə 120-dən çox zavod tikib. Zavod əlavə 2 il olmaqla (nöqsanların müəyyənləşdirilməsi dövrü) üç il ərzində tikiləcək.
Məişət tullantılarının yandırılması üzrə zavod Balaxanı qəsəbəsindəki 20 hektarlıq ərazidə tikilir. Zavodun gücü ildə 500 min ton təşkil edəcək. Bundan başqa, zavod yandırılması üçün ildə 10 min ton həcmində tibbi tullantıları da qəbul edəcək. Tullantıların yandırılması nəticəsində 231,5 milyon kilovat-saat həcmində elektrik enerjisi istehsal ediləcək. İstehsal olunan enerji şəhər şəbəkəsinə göndəriləcək. Zavod 2012-ci ilin sentyabrında istismara veriləcək.
İİB "Cənub" stansiyasının tikintisinə iki il güzəştli olmaqla 17 il müddətinə kredit ayırıb.
Layihənin ümumi dəyəri 664,1 milyon avro qiymətləndirilir. Bu günədək 514,4 milyon avro məbləğində maliyyələşmənin alınması təsdiqlənib.
Layihənin maliyyələşməsinə "Bayerische Landesbank", "Societe Generale" və "Credit Suisse" banklarından 300 milyon avro cəlb edilib. Kredit 10 il müddətinə dövlət zəmanəti əsasında verilib. Bank konsorsiumunun kredit resursları stansiyanın tikintisi ilə bağlı işlərin xərclərinin yarısını ödəyəcək. OPEC-in Beynəlxalq İnkişaf Fondu 20 milyon avro ayıracaq.
İstilik elektrik stansiyasının tikintisinə Əbu Dabi İnkişaf Fondu 60 milyon dollar ayırıb.
Asiya İnkişaf Bankı xarici kommersiya banklarından maliyyələşməyə cəlb etmək üçün 233,32 milyon avro məbləğində vəsaitin zəmanətli dəstəyini təklif edir.
"Cənub" stansiyası həm qazla, həm də mazutla işləyəcək.
İİB-nin Azərbaycanda 40 layihə üzrə kredit portfeli 850 milyon dollardır.
