Azərbaycan, Bakı, 11 oktyabr /Trend, müxbirlər İ.Xəlilova, N.İsmayılova/
Ölkənin Mərkəzi Bankı yanında fəaliyyət göstərən Azərbaycan İpoteka Fondu (AİF) ipoteka kreditlərinin verilməsi zamanı insan faktorunun minimallaşdırılmasını nəzərdə tutan "Elektron ipoteka" layihəsini hazırlayır. Bu barədə bazar ertəsi Azərbaycan Mərkəzi Bankının (AMB) İdarə Heyətinin sədri Elman Rüstəmov deyib.
"Bu günə İpoteka Fondu "Elektron ipoteka" layihəsinin yaradılması üzrə işlər görür və güman edirik ki, yaxın illərdə biz onu işə sala biləcəyik", - Rüstəmov qeyd edib.
Onun sözlərinə görə, layihə işə salındıqdan sonra əhalinin müraciəti və ipoteka kreditinin alınması üçün sənədlərin təqdim edilməsi prosesində insan faktoru tamamilə aradan qaldırılacaq və müraciətlər səlahiyyətli banklar vasitəsilə birbaşa İpoteka Fonduna daxil olacaq.
Cari ilin üç rübü ərzində AİF-in xətti ilə 73,5 milyon manat məbləğində kreditlər verilib. Ölkədə 2006-cı il martın 1-dən işə salınan ipoteka kreditləşməsi prosesi 2007-ci ilin yayında vəsait çatışmazlığı səbəbindən dayandırılmışdı. Proses 2009-cu il iyunun 1-də bərpa edilib.
Oktyabrın 11-nə olan rəsmi məzənnə 0,8020 AZN/USD təşkil edir.
