Azərbaycan, Bakı, 12 oktyabr /Trend, müxbir E.İsmayılov/
Azərbaycan, Rusiya və İranın dəmiryollarını birləşdirəcək "Şimal-Cənub" dəmiryol layihəsinin həyata keçirilməsinin yubadılması İran ərazisindəki mövcud problemlərlə bağlıdır. Bu barədə çərşənbə axşamı Azərbaycanın nəqliyyat naziri Ziya Məmmədov deyib.
"Şimal-Cənub" dəhlizində respublikamız üçün problem yoxdur. Problem İran İslam Respublikasının ərazisindədir. İran tərəfi dəmiryolun Qəzvin-Rəşt-Astara hissəsinin tikinti prosesini tezləşdirməlidir", - Məmmədov qeyd edib.
Onun sözlərinə görə, İran tərəfinin bu dəmiryol xəttinə qoşulması üçün uzunluğu 365 km olan sahənin tikintisi lazımdır. Azərbaycan ərazisində yolun yalnız səkkiz kilometrlik hissəsi tikilməlidir. Bu layihənin həyata keçəcəyi təqdirdə, dəmiryolun bərpası üzrə lazımi işlər görüləcək.
Nazirin sözlərinə görə, bu layihədə çox şey layihənin depozitariləri olan Rusiya, İran və Hindistandan asılıdır.
